Mga guro, magulang nagsisikap para di mapag-iwanan ang ilang Tondo students

ABS-CBN News

Posted at Oct 07 2020 05:33 PM | Updated as of Oct 07 2020 07:35 PM

Kinukuha ng ilang magulang ang mga module ng kanilang mga anak sa Isla Puting Bato sa Tondo, Maynila. ABS-CBN News

May mahabang pila nitong Miyerkoles sa Isla Puting Bato sa Tondo, Maynila.

Karamihan sa mga nakapila ay mga nanay na kumukuha ng module o babasahin galing sa mga teacher, na siya nilang iuuwi sa kanilang mga anak.

Kasama sa pila si Elena Calinawan, ina ng estudyanteng papasok ng Grade 3.

Matapos kuhanin ng module, nagmadali si Elena umuwi dahil bukod sa nababasa na ang mga papeles sa ulan, naghihintay ang 11 niyang anak.

Pinaka-excited sa mga anak si John Ray, na agad binuklat ang mga bago niyang aralin.

Sa may bintana ng kanilang bahay nag-aaral si John Ray dahil wala silang kuryente.

Hindi rin umano sapat ang kinikita ng kaniyang tatay sa pangingisda sa Manila Bay kaya wala silang pambili ng cellphone para sa online classes.

"Wala kaming magawa kasi kaunti lang huli ng asawa ko. Eh 'yong huli ng asawa ko, siyempre kaysa ibili ko ng cellphone, ibibili ko na lang ng pagkain," ani Elena.

Watch more in iWantTFC

Gagabayan daw ni Elena ang pag-aaral nina John Ray sa abot ng makakaya niya pero natatakot din siya na baka mapabayaan ang mga bata.

"Ako lang kasi mag-isa. 'Yong asawa ko, ang alam lang niya maghanapbuhay. Tapos siyempre 'di ko rin siya masubaybayan gaano kasi 'pag may huli 'yong asawa ko, ako rin ang magtitinda," ani Elena.

Maraming kuwento sa Isla Puting Bato ang tulad ng kina Elena. 

Bagaman namigay ng tablet ang lokal na pamahalaan ng Maynila para sa online class, madalas nauuwi pa rin ang mga estudyante sa de-papel na module dahil walang signal o kuryente.

Kaya ang mga guro naman, tulad ni George Marasigan, ang nagdadala ng modules sa komunidad para hindi na gumastos ang mga magulang sa pamasahe.

Pilit ding pinapaalala ni Marasigan sa mga bata kung bakit kailangan nilang pagbutihin, lalo ngayon.

"Para mabago 'yong kanilang katayuan sa buhay... 'Yon 'yong lagi kong inaano, 'yong may mabago lang ako sa kahit isang estudyante ko," aniya.

"Huwag nila kaming gayahin na hindi kami nakapagtapos. Kasi 'yan lang po talaga kami eh," sabi naman ni Elena ukol sa mga anak.

Noong Lunes, muling nag-umpisa ang klase sa mga pampublikong paaralan pero sa pamamagitan ng distance learning dahil sa patuloy na banta ng COVID-19.

Nauna nang iginiit ni Education Secretary Leonor Briones na tutugunan ng Department of Education ang lahat ng hamong maaaring lumabas mula sa bagong porma ng pag-aaral. -- Ulat ni Chiara Zambrano, ABS-CBN News

Bisitahin ang Patrol.PH para sa iba pang mga balita.