Mag-asawa na stranded sa Luzon ng 4 buwan, dumidiskarte para magkaroon ng pamasahe

Anjo Bagaoisan, ABS-CBN News

Posted at Oct 07 2020 05:11 AM

MAYNILA - Dumidiskarte bilang parking attendant ng isang fast food restaurant sa kanto ng Roxas Boulevard at Airport Road sa Parañaque City ang mag-asawang 4 na buwan nang stranded sa Luzon at naghahanap ng paraan at pamasahe para makauwi na ng probinsya.

Tuwing gabi, natutulog sa cardboard sa labas ng tindahan ng upholstery sa Buendia, Pasay si James Fernandez, 42, at asawa niyang si Sarah, 45. 

Hindi sila makauwi ng probinsya dahil wala na silang pamasahe. Naubos na kasi yung mga naunang ipon nila. Hirap din sila makakuha ng kailangang dokumento para makabiyahe. 

"Hindi ko makayanan ang gutom kaya nagtrabaho na lang ako kahit hindi ko linya," sabi ni James. 

"Andami na naming pinagdaanan ng asawa ko, parang hindi ko na po kaya. Parang gusto ko nang bumigay, kaya lang sabi ko kailangan lumaban kami para mabuhay kami sa mundo," sabi ni Sarah. 

Bago ang pandemiya, rumaket bilang billiard player si James, habang domestic helper naman sa Kuwait si Sarah. 

Napauwi si Sarah ng amo niya dito sa Pilipinas noong Hunyo at pinuntahan muna si James sa Pangasinan. 

Pero dahil gusto nilang makauwi sa bayan ni James sa Zamboanga, naglakad sila ng 2 araw papunta sa Maynila noong Setyembre. 

Inudiyok si James ng traffic enforcer ng Metropolitan Manila Development Authority (MMDA) na si Andy Ayub na mag-parking boy para may kitain. Pinayagan naman sila ng manager ng fast food chain. 

"Kung may extra akong pagkain, binibigay ko sa mag-asawa para maka-survive sila. Sabi ko may awa ang Diyos kasi mabait naman kayo e," kuwento ni Ayub. 

Nakiusap na lang ang mag-asawa sa guwardiya ng tindahan sa Buendia na payagan silang matulog doon. Pinapahiraman na lang sila ng payong tuwing umuulan.

Sa umaga, sumasakay sila ng shuttle ng Parañaque Integrated Terminal Exchange (PITX) at naglalakad mula terminal papunta sa restaurant. 

Pero aminado si James na mahirap din ito sa kanila lalo't may karamdaman na siya sa puso. 

"Pag sumakit puso ko di na ako nagpa-parking, natutulog na lang ako," sabi niya. 

"Kung anong pagkakakitaan nang marangal na mabubuhay ako nang maayos, 'yon na lang gagawin ko." 

Nagpapasalamat na lang sina James at Sarah sa kabutihan ng maraming tao na tumutulong sa kanilang maka-survive at unti-unti nilang makamit ang hangad na makauwi.

Sa mga nais tumulong sa mag-asawa, maaaring makontak si Sarah sa 0905-739-6806.

Bisitahin ang Patrol.PH para sa iba pang mga balita.