Ilang Metro Manila LGUs tumulong sa distance learning

ABS-CBN News

Posted at Oct 06 2020 07:11 PM | Updated as of Oct 06 2020 08:04 PM

Nakatanggap ng tablets ang mga magulang ng mga estudyante mula sa lokal na pamahalaan ng Maynila noong Agosto. George Calvelo, ABS-CBN News

Kaniya-kaniyang tulong ang iniabot ng mga lokal na pamahalaan sa Metro Manila sa mga estudyante ngayong sasabak ang mga ito sa distance learning.

Dahil ipinagbabawal pa ang face-to-face classes sa mga paaralan, ihahatid ang mga aralin ngayong school year sa mga estudyante sa pamamagitan ng printed at digital modules, online class, telebisyon at radyo.

Sa Mandaluyong City, namigay ang lokal na pamahalaan ng mga tablet para sa mga estudyante ng Grade 4 hanggang Grade 12, at laptop naman sa mga guro.

May "Tele-Aral Center" namang inilunsad sa Taguig City na puwedeng tawagan ng magulang o estudyante kapag gustong maliwanagan sa kanilang online learning.

Sa Makati, 27 jeep ang papapuntahin sa mga barangay para maghatid ng mga kakailanganin ng mga magulang at mag-aaral mula kinder hanggang Grade 12.

Puwede ring maki-connect sa WiFi ng mga "Dyipni Maki," magpa-print ng mga learning material, o manghiram ng libro.

Watch more in iWantTFC

May mga lisensiyadong guro rin na magsisilbing facilitators na haharap sa mga magulang na hihingi ng tulong sa mga jeep.

Kinuha ng lokal na pamahalaan ang serbisyo ng mga guro mula sa pribadong sektor, at jeepney driver na hindi pa nakakapasada.

Namigay rin ang lokal na pamahalaan ng Maynila ng gadgets at pocket WiFi devices sa mga mag-aaral.

Sa Valenzuela City, higit 8,000 mag-aaral sa mga piling paaralan ang nakatanggap ng mga libreng SIM card na may buwanang internet data.

-- Ulat ni Jorge Cariño, ABS-CBN News

Bisitahin ang Patrol.PH para sa iba pang mga balita.