Condo unit sa Maynila nilooban, P100-K halaga ng ari-arian natangay

ABS-CBN News

Posted at Oct 06 2020 03:20 PM | Updated as of Oct 06 2020 07:54 PM

Nasa P100,000 halaga ng ari-arian ang natangay ng isang kawatang nanloob ng condominium unit sa Maynila. ABS-CBN News

Aabot sa P100,000 halaga ng ari-arian ang natangay nang looban ng isang lalaking kawatan ang isang condominium unit sa Maynila.

Sa CCTV footage na kuha ng building administration, mapapanood na sakay ng pulang kotse ang kawatan, na hinarang ng guwardiya dahil hindi unit owner.

Pero hinayaan umano ang kawatan na pumarada sa carpark building.

Sumulat ang kawatan sa logbook pero hindi umano niya nilagay ang kaniyang pangalan.

Sa video na kuha sa hallway ng condo, makikitang kinatok ng kawatan ang mga kuwarto hanggang sa napunta sa unit ng bitkimang si "Benjie."

Watch more in iWantTFC

Pumasok ang kawatan sa kuwarto ni "Benjie" at makalipas ang ilang sandali ay lumabas na siya bitbit ang mga ninakaw na gamit. Wala si "Benjie" sa kaniyang unit nang mangyari ito.

Ayon kay "Benjie," kasama sa mga nakuha sa kaniya ay mga mamahaling gadget, tulad ng mga tablet at 2 laptop na gamit niya sa trabaho.

Ayon kay Lt. Col. Robert Sales, hepe ng Manila Police District Station 9, isolated case ang nangyari kay "Benjie" kaya hindi maaaring maituring na modus.

Pero istilo raw talaga ng mga kawatang magpanggap na bisita o unit owner para magkaroon ng access sa loob ng mga condominium building.

Ipinayo ni Sales sa unit owners na tiyaking naka-lock ang mga pinto tuwing aalis.

Nangangalap pa ng dagdag na CCTV footage ang mga pulis para matukoy ang pagkakakilanlan ng kawatan.

-- Ulat ni Jeck Batallones, ABS-CBN News

Bisitahin ang Patrol.PH para sa iba pang mga balita.