PatrolPH

KTV bar sa Pasay sinita sa paglabag sa health protocols

Anjo Bagaoisan, ABS-CBN News

Posted at Oct 05 2021 06:45 AM

MAYNILA—Inaresto ang floor manager ng isang KTV bar sa Pasay City matapos itong pasukin ng mga pulis dahil sa umano’y patuloy na operasyon na labag sa COVID-19 guidelines.

Wala nang naabutang mga customer sa loob ng KTV bar nang puntahan ng mga taga-station intelligence section ng Pasay police Linggo ng madaling-araw.

Nasa loob ito ng isang shopping center sa Macapagal Boulevard at kabilang ang mga banyaga sa mga kliyente.

Ayon kay Pasay City chief of police Col. Cesar Paday-os, nakatanggap kasi sila ng impormasyon na tumatanggap pa rin ng customers ang KTV bar.

Ito’y kahit ipinagbabawal pa rin ng IATF sa ilalim ng GCQ Alert Level 4 ang pagbubukas ng mga bar at nightclub.

Tiniketan para sa paglabag sa ordinansa sa social distancing at curfew ang 5 service crew at waiter doon.

Nasa kustodiya naman ng pulisya ang 29-anyos na floor manager ng bar.

Mahaharap siya sa kasong paglabag sa RA 11332 o Mandatory Reporting of Notifiable Diseases and Health Events of Public Health Concern Act. 

Pinasara na rin ang bar hangga’t patuloy na umiiral ang pagbabawal sa mga katulad nitong establisimento.

KAUGNAY NA VIDEO

Watch more on iWantTFC
Bisitahin ang Patrol.PH para sa iba pang mga balita.