PatrolPH

Imbakan ng mga tinda sa online shop nasunog sa Baclaran, Parañaque

Anjo Bagaoisan, ABS-CBN News

Posted at Oct 05 2021 06:27 AM | Updated as of Oct 05 2021 07:10 AM

Watch more on iWantTFC

MAYNILA—Di na kumalat sa mga katabing gusali ang sunog na tumupok sa isang commercial establishment sa dulo ng Taft Avenue sa Barangay Baclaran, Parañaque Martes ng madaling-araw.

Tumagal nang 4 na oras ang apoy na nagsimula bago mag-ala-1 ng madaling-araw. 

Ayon sa Bureau of Fire Protection, galing ang apoy sa pangalawang palapag ng gusali, na imbakan ng mga ibebenta sa online shopping gaya ng sapatos, tsinelas, at damit. 

Umabot ang sunog sa mga puwesto sa likuran ng unang palapag na mayroon ding mga combustible o nakasusunog na materyales gaya ng pintura, thinner at contact cement.

Mayroon ding stall na bodega ng mga tela at kurtina.

Nakaligtas naman ang 2 tauhang natutulog sa gusali nang magkasunog. Walang ibang sugatan sa insidente.

Ayon kay Barangay Chairman Jun Zaide, hindi na nadamay sa apoy ang residential area sa likod ng gusali.

Naapula ang apoy bandang 4:40 ng madaling araw. Kahit kasi idineklarang kontrolado ang apoy, may nagliliyab pa rin sa ikalawang palapag.

Sabi ng BFP, dahil ito sa dami at uri ng materyales sa nasunod na bodega.

Iniimbestigahan pa ang sanhi ng sunog, pati kung may mga nakahandang pamatay-sunog sa gusali.

Batay sa lawak ng gusali, tinatayang P600,000 ang halaga ng natupok, pero hindi pa kasama rito ang halaga ng mga panindang nasunog.

Bisitahin ang Patrol.PH para sa iba pang mga balita.