PatrolPH

1 patay, 10 sugatan sa gumuhong bahagi ng itinatayong Quezon City housing project

ABS-CBN News

Posted at Oct 04 2022 01:21 PM | Updated as of Oct 04 2022 08:21 PM

Watch more News on iWantTFC

MAYNILA (UPDATE) — Isa ang patay habang 10 ang sugatan matapos gumuho ngayong Martes ang bahagi ng scaffolding ng ginagawang housing project sa Quezon City, ayon sa lokal na opisyal.

Ayon kay Elmo San Diego, head ng Quezon City Department of Public Order and Safety, bandang alas-9 ng umaga nang mangyari ang insidente sa itinatayong extension ng affordable housing project ng lokal na pamahalaan sa Santo Kristo, Barangay Balingasa, malapit sa Balintawak.

"Iniimbestigahan natin 'yong contractor kung ano talaga nangyari. Apparently, scaffolding [ang bumigay]. Siguro marupok kaya nahulog, may mga tao sa ilalim," ani San Diego. 

Ayon kay San Diego, tigil muna ang konstruksiyon sa lugar habang patuloy na iniimbestigahan ang nangyari.

"Iimbestigahan muna 'yon kung 'yong safety procedures, safety protocols, nasunod nila. Otherwise, pasu-suspend muna natin construction kung hindi nasunod mga regulasyon natin," aniya.

Watch more News on iWantTFC

Sa isang pahayag, sinabi ng Quezon City government na isinugod ang mga nasugatan sa Quezon City General Hospital, kung saan kalahati rito ay nakalabas na habang 5 ang patuloy na ginagamot sa kanilang minor injuries.

Ipinag-utos na ng city government ang pagbibigay ng tulong sa pamilya ng nasawi at mga nasugatan, bukod pa anila sa tulong na ibinigay ng private contractor ng proyekto.

Nagkasa na rin ng inspeksiyon ang city architect and infrastructure committee, ayon sa lokal na pamahalaan.

Bisitahin ang Patrol.PH para sa iba pang mga balita.