Opisyal ng Biñan, patay sa pananambang saktong 3 taon matapos makaligtas sa ambush

Anjo Bagaoisan, ABS-CBN News

Posted at Oct 04 2020 10:55 PM | Updated as of Oct 05 2020 08:08 PM

MAYNILA (UPDATE) - Patay ang kalihim ng Sangguniang Panlungsod ng Biñan City, Laguna at isang doktor sa pananambang sa Barangay San Antonio, Biñan City Linggo ng gabi.

Ayon sa hepe ng Biñan City Police na si Lt. Col. Giovanni Martinez, pinagbabaril ng mga hindi pa nakikilalang gunman ang kotseng sinasakyan ng city council secretary na si Edward Reyes at ni Dr. Don Deocaris bandang alas-7:30 ng gabi. 

Hinarang ang sasakyan sa tapat ng isang mall sa Jubilation Road. 

Hindi na umabot nang buhay ang mga biktima sa University of Perpetual Help Hospital.

Hindi pa batid ang pagkakakilanlan at motibo ng mga suspek sa pananambang.

Watch more in iWantTFC

Ayon sa ulat ng pulisya, inginuso kamakailan si Reyes ng naarestong si Ricky Sison Ayub bilang mastermind umano ng serye ng pagpatay sa mga pulis at lokal na opisyal sa Biñan.

Noong Oktubre 4, 2017, eksaktong 3 taon bago siya napatay, nakaligtas si Reyes kasama ang 3 bodyguard sa pananambang sa sasakyan niya. 

Ilang araw pagkatapos noon, namatay sa pamamaril ang isang empleyado ng city hall na dating security staff ni Reyes. 

Pinsan si Reyes ng kasalukuyang kinatawan ng Biñan City na si Rep. Len Alonte-Naguiat at ni Biñan City Vice Mayor Gel Alonte. Anak naman niya si Konsehal Dada Reyes.

--May ulat nina Dennis Datu at Jeffrey Hernaez

Bisitahin ang Patrol.PH para sa iba pang mga balita.