DOH, nakatuon ang atensyon sa kalusugan ng mga mahihirap

Arianne Apatan, ABS-CBN News

Posted at Sep 30 2016 08:42 PM

COTABATO – Magandang balita ang hatid ni Department of Health (DOH) Secretary Paulyn Jean Ubial sa kanyang pagbisita sa Cotabato City ngayong araw.

Sa kanyang talumpati, binigyang-diin ng kalihim na nakatuon ngayon ang atensyon ng administrasyon ni Pangulong Rodrigo Duterte na matugunan ang kalusugan ng mga mahihirap.

Ilan dito ang pagbibigay ng “Red Card” sa mga mahihirap, para agad silang maasikaso sa ospital.

"Sabi ng presidente, you take care of the poor and I will provide the funds," ani Ubial.

Problema rin ngayon sa Cotabato Regional and Medical Center ang kakulangan ng mga ward, bungsod ng dumaraming bilang ng mga pasyente.

Pangako ng DOH, kanila rin itong tutugunan, dahil ayaw na umano ni Ubial na makakita ng mga pasyenteng nananatili sa mga daanan ng ospital dulot ng kakulangan ng silid.

Inihayag din ng kalihim na ang pondo na mula sa Philippine Gaming Corporation ay inilaan na ni Duterte sa kagawaran ng kalusugan.

Ang pagbisita ni Ubial sa Cotabato ay kasabay sa centennial celebration ng Cotabato Regional and Medical Center.

Bisitahin ang Patrol.PH para sa iba pang mga balita.