PatrolPH

Mga unang dumating para magparehistro sa Makati tumulong ilista ang mga kasamang nakapila

Anjo Bagaoisan, ABS-CBN News

Posted at Sep 29 2021 07:19 AM

Watch more on iWantTFC

MAYNILA—Mismong ang mga unang pumila sa registration site sa Makati City ang nagtulong-tulong na para magkaroon ng kaayusan sa paghihintay ng mga magpaparehistro sa bisperas ng palugit sa voter registration nitong Miyerkoles ng madaling-araw.

Pumila na ang mga tulad ni Orlando Dela Rosa alas-8 pa lang ng gabi ng Martes, kahit hindi pa nagsasara ang mall sa Barangay Carmona na kinalalagyan ng Comelec registration site para sa 2 district ng lungsod.

Kuwento niya, nabigo kasi silang makaabot sa cut-off ng pila noong Martes ng umaga kaya bumalik na lang sila.

May cut-off lang na 300 tao kada district o 600 kada araw, kasama na ang may appointment at walk-in.

Nagkusa na rin sina Dela Rosa na magpalista sa papel ng bilang nila sa pila at mag-abot ng stub na may numero para hindi magkagulo kahit marami pa ang dumating.

Naging pahirapan ang pagpapatupad ng physical distancing kaya may nagpaalala ring pumila ang mga tao nang maayos.

May hiwalay na pila kada district. Sa District 2, idinikit na ng mga nakapila ang numero sa dibdib para makita agad.

Kasama naman ng iba ang mga kapatid sa simbahan para hindi mabagot sa paghihintay. Nagdala na rin sila ng pagkain at pampalipas-oras.

Sila naman, pang-5 beses nang pumila sa registration site at naantala pa ng mga sunod-sunod na lockdown.

Kaya pasalamat nila nang umabot sila sa unang 100 nakakuha ng numero.

Nag-anunsyo na ng cut-off ang Ayala Malls Circuit para sa 300 katao kada district bago mag-alas-6. Pinalapit na ang tao sa mall bilang paghahanda sa pagbubukas ng registration site ng alas-8 ng umaga.

Bisitahin ang Patrol.PH para sa iba pang mga balita.