Bank transactions ng pamilya Duterte, iimbestigahan ng Ombudsman

ABS-CBN News

Posted at Sep 27 2017 09:01 PM

Iniimbestigahan na ng Office of the Ombudsman ang listahan ng umano'y bank transactions ni Pangulong Duterte at ng kaniyang pamilya na umaabot sa daan-daang milyong piso. 

Ibinigay ng Anti-Money Laundering Council (AMLC) ang transaction records sa Ombudsman noong nakaraang taon, ayon kay overall Deputy Ombudsman Arthur Carandang.

Ang listahan ng bank records ay may kaugnayan sa inumpisahang imbestigasyon ng Ombudsman noong 2016, bunsod ng alegasyon ni Senador Antonio Trillanes IV na may tagong-yaman si Duterte.

Saklaw umano ng listahan ang bank transactions ni Duterte mula pa noong siya ay alkalde ng Davao City. 

Bagama't ayaw humarap sa camera, pumayag si Carandang na magpa-interview.

"We can confirm that we received bank transactions from AMLC, bank transactions generated by AMLC," ani Carandang.

Ayon pa sa Deputy Ombudsman, base sa naturang bank records na nakalap ng AMLC, may daan-daang milyong pisong halaga ng mga transaksiyon sina Pangulong Duterte at kaniyang mga anak sa iba't ibang bangko mula 2006 hanggang 2016.

Pero nilinaw ni Carandang na labas-pasok ang transaksiyon sa accounts na ito sa loob ng mahabang panahon kaya't mahirap ding matukoy kung magkano talaga ang total deposits.

"'Yong billions kasi baka in-add nila 'yong lahat ng transactions, may P20 million, P20 million, P20 million, P16 million. Kapag in-add mo siguro 'yan, aabot ng billion. Ang dami... P40 million, P40 million, several P40 million, P200 million kaagad ito. 'Yong iba P50 million... Ang dami," paliwanag ni Carandang.

Habang tuloy pa ang imbestigasyon ng Ombudsman sa bank records ng pamilya Duterte, naghain naman si Trillanes nitong nakaraang Mayo ng plunder case laban sa Pangulo.

Kaya pormal nang sumulat ang Office of the Ombudsman sa AMLC para humingi ng opisyal na AMLC investigation report sa naturang bank transaction records.

Sa ilalim ng batas, ang AMLC ay itinuturing na financial intelligence unit ng gobyerno na maaaring mag-imbestiga ng mga suspicious transactions. 

May awtoridad ang Ombudsman na kunin ang anumang record mula sa anumang ahensiya upang maberipika ang sinumpaang statement of assets, liabilities, and net worth (SALN) ng mga opisyal at kawani ng gobyerno, kasama ang Pangulo.

Nag-inhibit naman si Ombudsman Conchita Carpio Morales sa naturang imbestigasyon dahil asawa ng kaniyang pamangkin na si Manases Carpio ang anak ng Pangulong Duterte na si Davao City Mayor Sara Duterte.

Pero ayon kay Morales, naniniwala siya sa kakayahan ng kaniyang Deputy Ombudsman na mag-imbestiga ng patas.

Pahayag ni Morales: "Even when he was still Mayor, I had already inhibited myself from acting on any case filed against the Dutertes and that is documented, since the President's daughter is married to my nephew. So I authorized Odo Carandang to handle the cases involving the Dutertes, and I have full trust in his impartiality."

Sabi ng Malacañang, inirerespeto nila ang trabaho ng Ombudsman at naniniwala silang wala itong kikilingan sa pagsasagawa ng kanilang imbestigasyon.

Wala rin umanong tinatago ang Pangulo.

Saad ng pahayag ni Presidential Spokesperson Ernesto Abella: "The President respects the internal processes of the OMB as an independent body and trusts its impartiality in the conduct of its fact-finding duty. The President has nothing to hide."

Ilang beses nang idiniin ng Pangulo na wala siyang tagong-yaman at may pera lamang siyang minana mula sa pinagbentahan ng ari-arian na naiwan ng kaniyang ama.

"I authorize everybody, everybody as in everybody, to look, dig into the IBAA, Insular Bank of Asia and America, that's the Union Bank now. You'd find there that, 'yong fourth year pa kami, I had a million already," sabi ni Duterte.

-- Ulat ni Henry Omaga-Diaz, ABS-CBN News

Bisitahin ang Patrol.PH para sa iba pang mga balita.