Natenggang jeepney drivers binigyang ayuda ng ABS-CBN

Lyza Aquino, ABS-CBN News

Posted at Sep 24 2020 12:20 PM

MAYNILA - Umabot sa 18 mga jeepney drivers na natengga ng halos kalahating taon dahil sa pandemya ang nahatiran ng tulong ng Pantawid ng Pag-Ibig Program ng ABS-CBN Huwebes ng umaga sa Quezon City.

Nakatanggap sila ng mga relief packs na naglalaman ng bigas, kape, delata at maging school supplies para sa kanilang mga anak.

“Napaka-importante po sa amin ang binigay ng ABS-CBN na pagkain at bigas sapagkat kami po ay walang kapera-pera pambili ng anumang bagay,” ayon kay Carlos Vista, biyudo na may anim na anak na sinusuportahan. 

Isa si Vista sa mga tsuper na namamalimos sa kanto ng Regalado Avenue at Pontiac Street.

“Hindi ko malaman saan ako kukuha ng pagkain namin. Wala kami natatanggap na ayuda mula sa gobyerno, kaya namalimos na kami. Ito na naisip namin na paraan para makakuha ng pagkain at mapansin kami ng gobyerno,” sabi ni Vista.

Bitbit ang malaking placard at plastic na galon ng tubig, buong araw matiyagang nag-aabang ang mga tsuper ng mga motoristang mag-aabot ng konting pera o ayuda sa kanila.

“Pinapaalis na kami sa bahay na tinirhan namin, kasi wala na ako pambayad. Hanggang December na lang kami sa inuupahan ko, binigyan na kami ng taning,” sabi niya.

Hindi pa sila makabiyahe ngayon dahil hindi kasama ng ruta nila na Lagro-Quaipo sa mga inaprubahang ruta ng Land Transportation Franchising and Regulatory Board.

Nananawagan naman sila sa LTFRB na sana ay makabalik na sila sa pamamasada para makapaghanap-buhay na para sa kanilang pamilya.