2 araw na tigil-pasada, magsisimula na bukas

ABS-CBN News

Posted at Sep 24 2017 03:20 PM | Updated as of Sep 24 2017 08:37 PM

Nakatakdang magdaos ng dalawang araw na tigil-pasada ang mga jeepney driver mula sa Metro Manila at ilang kalapit na probinsya simula Lunes, Setyembre 25.

Ito'y upang kondenahin ang phaseout ng mga lumang jeepney sa 2018, kaugnay sa plano ng pamahalaan na maglabas ng mga makabagong jeepney.

Pangungunahan ng Stop and Go Coalition ang tigil-pasada.

Iginiit ni Jun Magno, pangulo ng Stop and Go Coalition, mas mabuting ipaayos o i-rehab na lang ng mga driver at operator ang mga nabubulok na jeep sa halip na phaseout.

Tiniyak ni Magno na hindi nila haharangin ang mga jeep na hindi makikiisa sa protesta.

Ayon naman kay Aileen Lizada, tagapagsalita ng Land Transportation Franchising and Regulatory Board (LTFRB), naghahanda na ang pamahalaan upang tulungan ang mga driver at operator na maaapektuhang ng modernization program.

Maglalabas din umano ng show cause order ang LTFRB sa mga makikiisa sa tigil-pasada.

Una nang nag-protesta ang mga jeepney driver noong Setyembre 6 laban sa panukalang public utility vehicle modernization program.

Samantala, ilang lugar na rin ang nagsuspende ng pasok dahil sa jeepney strike.

-- May ulat ni Kevin Manalo, ABS-CBN News

Bisitahin ang Patrol.PH para sa iba pang mga balita.