PatrolPH

Isko Moreno Domagoso tatakbong pangulo sa halalan 2022; Willie Ong piniling VP

ABS-CBN News

Posted at Sep 22 2021 01:08 PM | Updated as of Sep 22 2021 08:58 PM

Watch more on iWantTFC

MAYNILA (UPDATE) — Pormal nang inanunsiyo ngayong Miyerkoles ni Manila Mayor Francisco "Isko Moreno" Domagoso na tatakbo siya sa pagkapangulo sa halalan 2022.

"Buong kababaang loob, inihahayag ko sa inyo, mga kababayan ko, sa darating na Mayo, tanggapin niyo po ang aking aplikasyon bilang pangulo ng Pilipinas," sabi ni Domagoso sa isang programang idinaos sa Baseco Compound sa Tondo.

"I will be a healing president," dagdag ni Domagoso, na tatakbo sa ilalim ng Aksyon Demokratiko, kung saan siya'y party president.

Ipinresenta rin ni Moreno ang cardiologist na si Willie Ong bilang kaniyang ka-tandem na tatakbo sa pagka-vice president.

Sa panayam ng ABS-CBN News, sinabi ni Domagoso na kung ano mang kapaki-pakinabang sa tao na programa ng Duterte administration ay ipagpapatuloy niya sakaling manalo.

"Kami na mamamahala. Umasa mga kababyaan nating Pilipino, ipagpapatuloy natin 'yon dahil kapakinabangan niyo 'yon," ani Domagoso.

Nang tanungin naman kung ibabalik niya ang prangkisa ng ABS-CBN, sagot ni Domagoso: "I made it clear in my speech: Rule of law."

"If Congress gives you such privilege, approve it, I will sign it," aniya.

Wala pang napiling senatorial lineup sila Domagoso at Ong at manliligaw pa anila sila ng mga posibleng kandidato sa mga susunod na araw.

Unti-unti rin daw nilang ilalahad sa mga susunod na araw ang kanilang mga plataporma.

Nilinaw naman ni "Yorme" na hindi pa rin siya titigil sa pakikipag-usap sa ibang grupo para magkaroon ng iisang oposisyon.

Bago naging alkalde, matagal nanilbihan si Domagoso bilang konsehal ng Maynila at naging vice mayor din.

Noong 2016, tumakbo siyang senador pero natalo.

Makalipas ang 1 taon, in-appoint ni Duterte si Domagoso sa Manila North Railways.

Watch more on iWantTFC

Samantala, aminado naman si Ong na wala sa plano niya ang pagtakbo sa susunod na halalan pero kaisa aniya siya ni Domagoso sa pagnanais na maibigay lang sa tao ang serbisyo ng gobyerno.

Sa kaniyang talumpati, sinabi ni Ong na "best vaccine" ang kaniyang maibibigay sa mga Pilipino.

Ayon kay Domagoso, kung pareho silang mananalo ni Ong, balak niyang ipaubaya sa doktor ang mga programang pangkalusugan at ibang isyung konektado sa pandemya.

Nakilala si Ong sa social media dahil sa kaniyang mga libreng payo tungkol sa kalusugan at ilang mga sakit.

Sa kabila ng malakas na suporta online, hindi pinalad si Ong na manalo bilang senador noong halalan 2019.

MUKHA NG OPOSISYON?

Umani ng sari-saring reaksiyon mula sa mga political analyst ang pagtakbo sa pagkapangulo ni Domagoso.

Kumbinsido si Atty. Tony La Viña na posibleng si Domagoso ang maging mukha ng oposisyon kung hindi tatakbo sa pagkapangulo si Vice President Leni Robredo.

Ipinaliwanag sa TeleRadyo ni La Viña, dating dean ng Ateneo School of Government, na si Robredo pa rin ang may hawak ng "anti-Duterte vote" pero puwede itong magparaya kay Domagoso.

Kaya mahalaga ang magiging kilos ng alkalde sa mga susunod na linggo, kabilang na ang paninindigan sa mga isyu gaya ng human rights violation.

"Si Yorme, from the very beginning, ambitious. From the very beginning, [he] wanted this... Si VP Leni, to be honest, hindi siya ambitious," ani La Viña.

Ayon naman kay Frederick Rey ng University of Santo Tomas Department of Political Science, bagama't may kakayahang manalo si Domagoso, mayroon din siyang mga limitasyon.

"'Yong isang bahagi na kailangang punuan ay 'yong kaniyang network, 'yong kaniyang tao sa ground," paliwanag ni Rey.

"Kung 'yong kaniya bang popularity dito sa city ay nakakaabot sa mga bayan-bayan, sa sulok, mga kanayunan sa probinsya."

Nagpadala ng suporta kay Domagoso ang mag-asawang Sen. Ralph Recto at Batangas Rep. Vilma Santos-Recto.

Bago sina Domagoso at Ong, nauna nang nag-anunsiyo sina Sen. Panfilo "Ping" Lacson at Vicente "Tito" Sotto III na tatakbo bilang president at vice president sa susunod na halalan.

Nitong Linggo, pormal na ring nagdeklara si Sen. Manny Pacquiao na tatakbo siya sa pagkapangulo sa May 9, 2022 elections.

— Ulat nina Jorge Cariño at Katrina Domingo, ABS-CBN News

Bisitahin ang Patrol.PH para sa iba pang mga balita.