ALAMIN: Mga isasarang U-turn slots sa EDSA bago mag-Pasko

ABS-CBN News

Posted at Sep 22 2020 11:05 AM

MAYNILA - Plano ng MMDA na magsara ng aabot sa 13 U-turn slot sa kahabaan ng EDSA bago mag-Pasko para magbigay-daan sa bus lanes sa inner-most areas ng EDSA. 

Bagay ito na tinutulan ng ilang motorista. 

Ayon sa MMDA, mas mapapabilis umano nito ang biyahe ng mga motorista dahil maiiwasan na ang pagkabuhol-buhol ng mga sasakyan kapag nabubuo ang mga pila na sa mga U-turn slot. 

"Hindi naman sabay-sabay na ihihinto, uunti-untiin natin. Ang target po natin talaga is to give priority to our commuters na mas nakakarami," ani MMDA General Manager Jojo Garcia. 

Unang isasara sa Setyembre 28 ang U-turn slot malapit sa North Avenue Station. Isa ito sa 7 U-turn slot na isasara sa Quezon City. 

Tig-tatlong U-turn slot naman ang isasara sa Caloocan, at sa Makati at Pasay City. 

QUEZON CITY 

  • Balintawak Market
  • Kaingin Road
  • Congressional LRT Station
  • Corregidor Intersection
  • Quezon City Academy
  • MRT before MRT North Avenue Station
  • Santolan/Boni Serrano

Alternatibong ruta: Dumaan sa ilalim ng Quezon Avenue o Santolan Flyover 

CALOOCAN

  • General Tinio
  • De Jesus Street
  • General Malvar 

Alternatibong ruta: Dumaan ng Monumento Circle o Balintawak Cloverleaf

MAKATI AT PASAY 

  • Buendia (ilalim ng Kalayaan Flyover)
  • P. Celle
  • Roxas Boulevard malapit sa Heritage Hotel

Alternatibong ruta: Dumaan sa intersection ng EDSA at Ayala Ave. o Magallanes Flyover 

Hati ang opinyon ng ilang motorista tungkol dito. 

Ang ilang taxi driver gaya ni Arthur Tengco, nagsabing posible itong makaapekto sa kanilang biyahe dahil mapapalayo ang biyahe ng mga sakay at maiipit sila sa trapiko. 

Sang-ayon dito ang driver na si Jeff Materig. 

Ang motoristang si Alejo Artisal, umaasa naman na magiging "maayos 'yong pagpapatupad" ng panuntunan. 

Humingi naman ng pang-unawa ang MMDA sa mga apektadong motorista at magbibigay naman daw sila ng abiso bago isara ang partikular na U-turn slot.

-- Ulat ni Jervis Manahan, ABS-CBN News

Bisitahin ang Patrol.PH para sa iba pang mga balita.