PatrolPH

Maguindanao gov't workers naghahanda sa paghahati ng probinsiya

Anjo Bagaoisan, ABS-CBN News

Posted at Sep 19 2022 02:33 PM | Updated as of Sep 19 2022 07:39 PM

Watch more News on iWantTFC

Isang araw pa lang mula nang magwagi ang botong pabor sa paghati sa Maguindanao sa 2 lalawigan, abala na ang mga taga-provincial government para matiyak na magiging mabilis at tuloy-tuloy ang 2-buwang transition period.

Sa katunayan, 2 linggo bago ang plebisito, inalam na kung sino-sino sa mga nagtatrabaho sa kapitolyo ang gustong lumipat sa magiging bagong kapitolyo ng Maguindanao del Norte sa bayan ng Datu Odin Sinsuat kung magwagi ang "yes" votes.

Ang Buluan, kung saan matatagpuan ang kasalukuyang kapitolyo, ang magsisilbing kapitolyo ng Maguindanao del Sur.

Ayon kay Monina Macarongon, provincial human resources management officer, may 197 na empleyado na piniling lumipat sa Del Norte kapag nabuo na ang tanggapan doon.

May 189 naman na nagsabing maiiwan sila sa Buluan.

Lagpas 30 naman ang hindi pa nakakapagdesisyon kung lilipat o maiiwan.

Ayon kay Macarongon, karaniwang dahilan ng mga gustong magpalipat ay para mas malapit ang pagtatrabahuan at maiwasang ma-late o ma-undertime.

Kasama sa magpapalipat si Fatima Bansuan, isang project development officer na araw-araw umuuwi sa Datu Odin Sinsuat.

Ayon sa kaniya, makakatipid siya sa pamasahe dahil inaabot ng hanggang P1,000 ang ginagastos niya sa isang araw.

Mas magkakaroon din umano siya ng panahon para sa pamilya.

Tiniyak ni Macarongon na tuloy-tuloy pa rin ang serbisyo sa kapitolyo dahil hindi pa naman aalis ang mga magpapalipat na empleyado hangga't wala pang nabubuong bagong tanggapan.

Nasa pamunuan naman ng mga mabubuong probinsya kung ilan ang kukuning bagong empleyado para mapunan ang mga maiiwan na puwesto o kung ilalaan na lang ito sa ibang sangay ng probinsya.

Sa ngayon, hinihintay pa ang opisyal na pagtalaga sa mga magiging bagong gobernador at Sangguniang Panlalawigan sa Maguindanao Del Norte at Del Sur para sila ang maglalatag ng mga bubuong ahensya, tauhan, at budget.

RELATED VIDEO

Watch more News on iWantTFC
Bisitahin ang Patrol.PH para sa iba pang mga balita.