Batang nahulog sa ilog sa Bataan, pinaghahanap pa rin

Rod Izon, ABS-CBN News

Posted at Sep 19 2019 10:13 AM

Nahulog sa tulay sa gilid ng isang bagong mall ang bata na patuloy pa ring pinaghahanap. Larawan mula kay Jimmy Sy

BALANGA CITY, BATAAN – Patuloy na pinaghahanap ang isang limang taong gulang na babae na nahulog sa tulay nitong Martes ng gabi.

Bigo pa ring matagpuan ng search and rescue team ng Bataan ang batang inanod ng malakas na tubig ng ilog matapos mahulog mula sa tulay sa gilid ng bagong mall sa Barangay San Jose.

Sa inisyal na ulat, sinasabing galing ang biktima kasama ang kapatid sa paglalaro sa bagong bukas na mall sa tabi ng isang malaking river channel nang habulin at tangkaing hulihin ang isang ibon na nakadapo malapit sa tulay.

Nadulas ang bata at tuluyang nahulog sa ilog. Malakas ang agos ng tubig sa ilog dahil sa matinding pag-ulan dulot ng habagat at tinangay ang bata.

Tinangka pero bigong maisalba ang bata ng dalawang lalaking nakakita sa insidente.

Kasalukuyang nagtutulungan ang Philippine Coast Guard at Metro Bataan Development Authority sa search and rescue operations.

Bisitahin ang Patrol.PH para sa iba pang mga balita.