PatrolPH

114 sa isang kumbento sa QC, nagpositibo sa COVID-19

Zyann Ambrosio, ABS-CBN News

Posted at Sep 15 2021 02:51 PM | Updated as of Sep 16 2021 07:49 AM

Watch more on iWantTFC

(2nd UPDATE) Higit 100 ang nagpositibo sa COVID-19 sa isang kumbento sa Quezon City, kung saan karamihan ay mga madre.

Sa kabuuang 114 positibo sa COVID-19 sa kumbento sa District 4, 64 ang madre, ayon sa datos mula sa Quezon City Epidemiology and Surveillance Unit (CESU).

Ang iba naman umano ay mga lay partner, health aide, caregiver at mga driver.

Natuklasan ang pagkalat ng sakit sa kumbento matapos magpositibo ang isang driver, na sumailalim sa swab test dahil sa mga naramdamang sintomas.

Sa mga positibo sa sakit, 86 ang nakakaranas ng mild symptoms habang 22 ang walang sintomas. May 4 na moderate ang mga sintomas at 2 severe na ginagamot sa intensive care unit ng infirmary.

Aabot sa 400 ang nananatili sa loob ng kumbento at halos 300 ang kailangan pang dumaan sa swab test. Sa ngayon, hiniwalay na ang mga positibo at negatibo sa sakit.

Sa pahayag sa Teleradyo nitong Huwebes, nasa 150 na lamang ang kailangan pang i-swab, ayon kay Christopher Cheng, chairman ng Barangay Kaunlaran.

"Nalaman lang namin nung binabaan kami ng letter ng CESU, na magkakaroon ng special concerned lockdown dahil nga merong 112 cases po," aniya.

"So far okay naman sila then nakikipagcoordinate kami para sa mga pangangailangan nila."

Wala pa namang nangangailangan dalhin sa ospital, dagdag niya.

"Wala pa po pero dun sa area merong dina-dialysis na kailangan ilabas, kailangan namin sila samahan para madialysisis. May checkup ang iba dahil may (comorbidity) na po pero ang iba di pa naman positive," ani Cheng.

Maaaring maghatid ng donasyon sa barangay hall ng Kaunlaran, dagdag niya.

Ayon kay Quezon City Mayor Joy Belmonte, nakauton ang lokal na pamahalaan ngayon sa mga enclosed na lugar matapos makatala roon ng malaking bilang ng mga kaso ng COVID-19.

Kasama rito ang isang orphanage sa Barangay Bagumbuhay, kung saan halos 1100 bata ang nagka-COVID, at isang barracks sa Barangay E. Rodriguez kung saan nagkahawahan ang higit 50 construction worker.

"Kailangan ilista na ang closed facilities na ito," ani Belmonte.

Iniutos ni Belmonte sa CESU na bisitahin lahat ng mga enclosed na lugar sa lungsod at tiyaking sumusunod na minimum health protocol.

Watch more on iWantTFC
Bisitahin ang Patrol.PH para sa iba pang mga balita.