Bakunahan sa Pateros, bukas sa walk-in na residente

Anjo Bagaoisan, ABS-CBN News

Posted at Sep 14 2021 10:04 AM

MAYNILA - Binuksan para sa mga walk-in na Pateros residents ang 2 vaccination center sa bayan ngayong Martes hanggang Miyerkoles.

Kailangan lang magdala ng valid government ID na nagpapatunay na nakatira sa Pateros, ayon sa lokal na gobyerno. Hindi kasama rito ang barangay ID at barangay certification.

Ang pagbubukas ng walk-in vaccination ay paraan upang maengganyo ang nasa 14,000 taga-Pateros na hindi pa nagpapabakuna, ayon kay Edgar Noel Castillo ng Pateros public information office. 

Umabot na sa 80 porsyento ng target ng bayan ang bilang ng mga residenteng nakakompleto ng bakuna.

Marami kasi sa mga nagpaparehistro sa bakuna ay hindi nakakapunta sa araw ng schedule. Bukod dito, may ilang hirap din makapagparehistro online.

Nagbabakuna ngayon sa Pateros Catholic School Annex sa Barangay San Pedro at sa AMC Gym sa Barangay San Roque.

Karamihan mga second dose ang dumating sa Pateros Catholic School vaccination site umaga ng Martes.

Pero sinamantala pa rin ang walk-in ng ilang mga residente gaya nina Alma Pasayon at Ressey Reyes. Si Pasayon ay umabsent pa sa trabaho para makapagpabakuna.

"Hindi po ako nakakapag-register, so magwa-walk-in ako ngayon. Mayroon din kasi akong baby kaya kailangan magpa-vaccine. Siyempre mas magandang vaccinated ka," ani Reyes.

Bukas ang pagpapabakuna sa mga hindi taga-Pateros pero kailangan nakarehistro online at nabigyan ng schedule.

Paniguro ito laban sa mga magsusubok na makakuha ng sobra o booster COVID dose.

Sa nakaraang halos 1 buwan nasa 3,000 mahigit na ang napabakunahan na taga-NCR at may 500 pang mula sa labas ng Metro Manila. 

Ayon sa datos ng ABS-CBN Investigative & Research Group, lumagpas na ng halos 30 porsyento ang bilang ng mga nabakunahan sa Pateros kumpara sa bilang ng mga residenteng edad 18 pataas.

Umabot na ang bilang ng mga nakakuha ng unang dose sa 59,988 katao noong Setyembre 7.