Negosyante patay sa pamamaril sa Butuan City

ABS-CBN News

Posted at Dec 28 2020 03:41 PM

Patay ang isang babae matapos barilin ng hindi pa nakikilalang gunman sa Butuan City noong Disyembre 27, 2020. Retrato mula sa Butuan City Police Station 3.

Patay ang isang babaeng negosyante matapos umanong barilin ng hindi pa nakikilalang salarin sa Butuan City noong gabi ng Linggo.

Kinilala ng mga awtoridad ang biktima bilang si Shirley Codilla, 43 taong gulang.

Bandang alas-7 ng gabi nang barilin sa loob ng isang subdivision si Codilla, na noon ay kasama pa ang kaniyang 11 taong gulang na anak na lalaki.

Ayon kay Capt. Emerson Alipit, commander ng Butuan City Police Station 3, nagtamo rin ng tama ng bala sa braso ang anak ni Codilla, na ngayo'y nagpapagaling sa ospital.

Narekober sa crime scene ang 2 basyo ng bala at tsinelas ng gunman.

Ayon sa mga testigo, hinintay ng gunman ang mga biktima sa labas ng kanilang bahay.

Bumili pa umano ang gunman ng sigarilyo sa tindahan malapit sa crime scene.

Hindi pa matiyak ng mga awtoridad ang motibo sa pamamaril.

-- Ulat ni Charmane Awitan, ABS-CBN News

RELATED VIDEO:

Watch more in iWantTFC
Bisitahin ang Patrol.PH para sa iba pang mga balita.