PatrolPH

Pemberton nakalaya, nakalipad na pabalik ng Amerika

ABS-CBN News

Posted at Sep 13 2020 12:54 PM | Updated as of Sep 13 2020 06:59 PM

Pemberton nakalaya, nakalipad na pabalik ng Amerika 1
Dumating si US Marine Joseph Scott Pemberton sa Ninoy Aquino International Airport, kung saan sumakay siya ng U.S. military plane pabalik ng Amerika. Retrato mula sa Bureau of Immigration

MAYNILA (UPDATE) - Tuluyan nang nakalaya at nakalipad pabalik ng Amerika ngayong Linggo ang Amerikanong sundalong pumatay sa isang Filipino transwoman, matapos siyang bigyan ng pardon ni Pangulong Rodrigo Duterte.

Matapos ang halos 6 na taong pagkakakulong sa Pilipinas, pinalaya na si Lance Cpl. Joseph Scott Pemberton, 25, na nahatulang guilty sa pagpatay kay Jennifer Laude noong 2014 sa Olongapo City.

"It was a relaxed deportation. Surprisingly po, wala naman po tayong naging aberya and we’re thankful for that," ani Bureau of Immigration Spokesperson Dana Sandoval.

Watch more on iWantTFC

Naging mahigpit ang seguridad sa paglaya at pag-alis ng sundalo sa bansa: ipinagbabawal ang media maliban sa state broadcaster na PTV, at may mga nakabantay pang sundalo sa daanan ng convoy ni Pemberton.

Sinamahan si Pemberton ng mga tauhan ng U.S. Embassy papunta sa Ninoy Aquino International Airport, kung saan sinundo siya ng U.S. military pabalik ng Amerika.

Ayon kay Sandoval, habambuhay nang blacklisted si Pemberton, at ituturing siyang undesirable alien at banta sa mga Pilipino.

Ayon kay Justice Secretary Menardo Guevarra, tila nabunutan siya ng tinik nang tuluyang makaalis ng bansa ang sundalo.

May mga aral aniyang mapupulot at dapat pag-isipan sa nangyari pagdating sa Philippine-US visiting forces agreement (VFA), at ang paggamit ng pangulo ng kaniyang kapangyarihan sa ilalim ng Saligang Batas.

Nagkakasundo naman ang mga eksperto na mahirap kuwestiyunin ang pasya ng pangulo na magbigay ng absolute pardon.

Kinondena naman ng iba't ibang grupo ang tila special treatment kay Pemberton sa ilalim ng VFA.

Lumabas sa isang retrato na may aircon sa piitan ni Pemberton habang siksikan ang libo-libong preso sa mga bilangguan sa bansa.

Watch more on iWantTFC

Ayon kay Bagong Alyansang Makabayan Secretary General Renato Reyes, talo na naman ang bansa sa paglaya ni Pemberton.

Panahon na umano para suriin ang epekto ng kasunduan sa soberanya ng bansa at siguruhing hindi na mauulit ang mga krimen laban sa mga Pilipino.

Para naman kay Bayan Muna Rep. Ferdinand Gaite, hindi dapat mabaon sa limot si Laude, ang pumatay sa kaniya at nagpalaya sa kaniyang killer.

Ang dapat sana'y 10 taong pagkakabilanggo kay Pemberton ay tinuldukan ng absolute pardon ni Duterte noong Setyembre 7.

Ayon kay Duterte, binigyan niya ng pardon si Pemberton dahil hindi naging patas ang pagtrato ng bansa sa dayuhang sundalo.

Ipinaliwanag ni Duterte na walang kasalanan si Pemberton kung walang naitalang record ng kaniyang naging asal sa loob ng kulungan kaugnay ng kinukuwestiyong good conduct time allowance (GCTA).

Nauna nang pinayagan ng korte na maagang mapalaya si Pemberton dahil sa umano'y mabuting asal sa piitan — bagay na inalmahan ng pamilya Laude at plano rin sanang kontrahin ng Department of Justice. 

Natagpuan ang katawan ni Laude sa banyo ng isang hotel sa Olongapo City, kung saan nag-check-in ito kasama si Pemberton, noong Oktubre 2014.

Sa paglilitis ng kaso, inamin ni Pemberton na sinakal niya si Laude nang malamang ito ay may male genitalia matapos ang isang intimate act. Hinatulan ng 6 hanggang 10 taong pagkakakulong si Pemberton noong December 2015. -- May ulat nina Michael Delizo at Mike Navallo, ABS-CBN News

Bisitahin ang Patrol.PH para sa iba pang mga balita.