Umano'y supplier ng droga nasakote matapos makipaghabulan sa pulis sa QC

ABS-CBN News

Posted at Sep 10 2020 04:34 PM

MANILA — Arestado ang isang lalaki na umano’y supplier ng droga sa isang buy-bust sa Quezon City ngayong Huwebes. 

Kinilala ang suspek na si Kenneth Santillan, na nakipaghabulan pa umano at nakipagbarilan sa mga pulis bago maaresto. 

Ayon sa Quezon City Police District, nakatunog umano ni Santillan na pulis ang kaniyang nakatransaksiyon kaya sinubukan umano nitong tumakas gamit ang kaniyang kotse.

Nakipagbarilan pa umano ang suspek sa mga pulis at nakabangga ng ilan pang mga sasakyan habang nakikipaghabulan. 

Kalauna’y na-corner ang suspek sa Harvard Street, at naaresto. 

Natukoy na si Santillan ang supplier ng droga nang mahuli ang dalawang suspek at itinuro siya bilang pinagkukunan nila ng supply.

— Ulat ni Doland Castro, ABS-CBN News

Bisitahin ang Patrol.PH para sa iba pang mga balita.