PatrolPH

Metro Manila balik-GCQ simula Setyembre 8; 'localized lockdowns' ipatutupad

ABS-CBN News

Posted at Sep 06 2021 02:26 PM | Updated as of Sep 06 2021 06:29 PM

Nakapila ang mga commuter sa EDSA Bus Carousel station sa Caloocan City noong Setyembre 2.
Nakapila ang mga commuter sa EDSA Bus Carousel station sa Caloocan City noong Setyembre 2. Mark Demayo, ABS-CBN News

MAYNILA (UPDATE) - Ibababa na sa general community quarantine (GCQ) o ang ikalawa sa pinakamaluwag na lockdown level sa bansa, ang buong Kamaynilaan simula Setyembre 8.

Inanunsiyo ito matapos ang pahayag ng Department of Health na nasa "Alert Level 4" o ang pinakamataas na alert level ang buong National Capital Region - maliban sa siyudad ng Maynila na nasa "Alert Level 3." 

Pero kaakibat ng pagpapatupad ng GCQ, maglalagay ng dagdag na restriction ang mga lokal na pamahalaan, ayon kay Presidential Spokesperson Harry Roque. 

"Magkakaroon po ng pilot dito sa Metro Manila at ito po 'yong tinatawag nating localized lockdowns," ani Roque sa isang press briefing. 

Nitong Lunes o bukas nakatakdang maglabas ang IATF ng mga panuntunan para sa pilot areas. 

Dati nang napagkasunduan ng mga ahensiya ng pamahalaan na palitan ang mga quarantine restriction sa mga localized lockdown, na ililimita sa mga gusali o kaya mga lansangan at mga village.

"Kaya naman po natin pina-pilot natin ito, nakita natin na miski tayo po ay nag-ECQ ay parang hindi masyadong bumababa ang mga kaso. Ang tingin ng mga eksperto, mas epektibo po kung tayo po talaga ay magpapatupad ng systematic at scientific granular lockdowns," ani Roque. 

Nitong Linggo ay sinabi rin ng Metro Manila Council na napagpasyahan nilang magpatupad ng "mas simple" na quarantine restrictions, matapos ianunsiyo ang planong mag-granular lockdown. 

Ito anila ay para makarekober ang ekonomiya dahil sa epektong idinulot ng mga malawakang lockdown. 

"Imbis na buong NCR ang iyong i-lockdown, ang gagawin natin, lockdown na lang pabutil-butil, kung saan lamang may inpeksyon. Kunyari, isang bahay lang, dalawang bahay. Ganoon na po ang magiging shift natin ngayon. More of sa LGU na po, hindi na buong Metro Manila," ani MMDA Chairman Benhur Abalos, na kasama rin sa Metro Manila Council, sa isang panayam nitong Linggo sa TeleRadyo. 

Nagbabala ang ilang eksperto na wala pa silang nakikitang senyales na bababa ang mga kaso ng COVID-19 sa bansa, kung saan mahigit 20,000 kada araw na ang naitatala sa loob ng tatlong araw. 

Para sa Philippine College of Physicians, posibleng di umubra ang ipinapanukala ng gobyerno. 

"What about the people who will have to go to work whose workplaces not in same locality, probably in another LGU? What will happen to these people? Will workplaces be able to understand their absence? Industry is open," ani Limpin, ilang oras bago ang anunsiyong bagong quarantine restrictions. 

Dagdag niya: "This actually makes it hard for people to follow the lockdown. They will still go out, they want to assure they will still have work and that is very important. I don't think these granular lockdowns will still be as effective as they will like to." 

Inalmahan din ito ng OCTA Research. 

"If it's on a smaller scale it might work but during the start of the ECQ back in March they imposed granular lockdowns in Pasay but we had to ECQ to contain the surge eventually," ani OCTA fellow Guido David. 

Bukod sa Metro Manila, naka-GCQ ang mga sumusunod na lugar: 

- Baguio City, Kalinga, Abra, Benguet
- Dagupan City
- Santiago City, Quirino, Isabela, Nueva Vizcaya
- Tarlac
- Occidental Mindoro, Puerto Princesa
- Aklan, Guimaras, Negros Occidental
- Cebu City, Mandaue City
- Zamboanga Sibugay, Zamboanga City, Zamboanga Del Norte
- Misamis Occidental, Iligan City 
- Davao Oriental, Davao Del Sur 
- General Santos City, Sultan Kudarat, Sarangani, North Cotabato, South Cotabato
- Agusan Del Norte, Agusan Del Sur, Dinagat islands, Surigao Del Norte, Surigao Del Sur
- Cotabato City, Lanao Del Sur 

Nasa modified enhanced community quarantine (MECQ) naman ang 10 iba pang lugar, habang naka-GCQ with "heightened restrictions" ang 20 na mga lungsod at lalawigan.

Magtatagal hanggang katapusan ng Setyembre ang nabanggit na quarantine restrictions. 

-- May mga ulat nina Jamaine Punzalan at Pia Gutierrez, ABS-CBN News

KAUGNAY NA VIDEO

Watch more on iWantTFC
Bisitahin ang Patrol.PH para sa iba pang mga balita.