TFC News

Buwan ng Wikang Pambansa, ipinagdiwang sa Bahrain

Jerome Fadriquela | TFC News

Posted at Sep 06 2021 10:05 PM | Updated as of Sep 07 2021 01:44 AM

MANAMA - Isang virtual celebration ang isinagawa noong August 27, 2021 ng Philippine Embassy sa Manama, Sentro Rizal Manama at ng Filipino organization na Wika Toastmasters Club na pinamagatang “Kwentuhan, Balagtasan at Musikahan sa Pasuguan,” bilang bahagi ng pagdiriwang ng Buwan ng Wikang Pambansa.

Buwang ng Wika sa Bahrain
Photo: Philippine Embassy in Manama, Bahrain

Mismong si Philippine Ambassador to Bahrain Alfonso Ver ang nagbigay ng pambungad na talumpati at sinundan ng video message ni Dr. Arturo Casanova, pangulo ng Komisyon sa Wikang Filipino at Amor dela Cruz, pangulo ng Wika Toastmasters Club. Ipinakilala ni Dela Cruz ang kanilang club sa mga dumalo at hinimok ang overseas Filipinos sa Baharin na laliman pa ang kaalaman tungkol sa Wikang Pambansa.

Buwang ng Wika sa Bahrain
Photo: Philippine Embassy in Manama, Bahrain

Layon ng online event na ipakilala ang kulturang Pilipino lalo na sa kabataang Pinoy ng Bahrain. Nagkaroon ng apat na bahagi ang online event, una ang “Kwentuhan” session, isang storytelling presentation na isinagawa ni Melinda Nomananap isang high school teacher at voice artist.

Buwan ng Wika sa Bahrain
Photo: Philippine Embassy in Manama, Bahrain

Sinundan ito ng “Balagtasan” ng Wika Toastmasters Club. Sa “Musikahan,” kinanta ni Beatriz Erica Advincula, isang elementary school student ng Philippine School Bahrain ang awit na “Kalawakan.” Sa “Talumpati,” nagbigay ng nakatutuwang talumpati si Ricardo Chuidian, Jr., ang kauna-unahang Filipino champion ng Saudi Arabian Toastmasters Annual Conference 2021 (SATAC 2021).

Para sa mga nagbabagang balita tungkol sa ating mga kababayan sa Bahrain, tumutok sa TFC News sa TV Patrol.

Source: DFA website