18-wheeler truck tumagilid matapos lumusot sa hukay sa Sta. Ana, Maynila

Lady Vicencio, ABS-CBN News

Posted at Sep 03 2020 05:38 AM | Updated as of Sep 03 2020 07:40 PM

MAYNILA - Isinara sa mga motorista ang westbound lane ng Lambingan Bridge sa Sta. Ana, Maynila matapos tumagilid ang isang 18-wheeler truck sa nasabing tulay Miyerkoles ng gabi.
 
Lumusot ang likurang bahagi ng trak sa hukay bago makaakyat sa tulay kung saan may kasalukuyang konstruksyon ang Manila Water.

Ayon sa driver ng trak na si Reggie Torres, walang harang ang hukay kaya dirediretso lang siya sa pagmamaneho. 

Dahil kargado ng semento ang trak, bumigay ang steel plate na pinantakip sa hukay at nahulog ang trak tsaka tumagilid nang mawalan ng balanse. 

Watch more in iWant or TFC.tv

Nayupi ang bahagi ng nakaparadang trak ng construction site nang mabagsakan ng 18-wheeler.

Galing pa umano ng Bulacan si Torres at magdedeliver sana ng semento sa Makati. 

Wala namang nasaktan sa insidente. 

Sa inisiyal na imbestigasyon ng Sta. Ana Police, pumailalim ang isa sa mga barikada sa construction site kaya maaaring hindi ito napansin ng driver dahil masyado itong maliit. 

Ayon kay Donald Abuel, kagawad ng Barangay 892, nakukulangan sila sa warning device at walang sariling ilaw ang construction site.

Umabot ng higit limang oras bago natanggal ang trak sa hukay at mabuksan muli sa trapiko ang westbound lane ng tulay. 

Itutuloy ng Manila District Traffic Enforcement Unit ang imbestigasyon sa insidente.

Bisitahin ang Patrol.PH para sa iba pang mga balita.