PatrolPH

Canadian, natangayan umano ng P13 milyon ng Pilipinang nakilala sa Facebook

ABS-CBN News

Posted at Aug 30 2022 01:29 PM


Nahaharap sa kasong estafa ang isang ginang matapos umano niyang huthutan ng nasa P13 milyon ang isang lalaking Canadian na nakilala niya sa Facebook.

Naaresto noong Linggo ng hapon sa entrapment operation sa Sta. Cruz, Laguna ang 33-anyos na suspek, na taga-Calamba City.

Inaresto ang suspek dahil sa reklamo ni Bruce Thomas Marshall, isang 65-anyos na Canadian na dumating sa Pilipinas noong Agosto 11.

Ayon sa banyaga, nakilala niya sa Facebook ang suspek at nakumbinsi siya nitong magpadala ng perang umabot sa higit P13 milyon mula noong 2019.

Ipagpapagawa umano ng ginang ng townhouse ang pera ng biktima para sa plano nitong paninirahan na sa Pilipinas.

Subalit noong magkita ang 2, walang maipakitang townhouse ang suspek at mula noon ay nagtago na ito.

Muling kinontak ng suspek ang biktima sa Messenger at humingi pa ng P350, 000 para umano makapagpagawa ito ng mini grocery upang magkaroon siya ng hanapbuhay at makabayad sa dayuhan.

Doon na nagsumbong sa pulisya ang biktima at isinagawa ang entrapment operation sa bayan ng Sta. Cruz.

Patuloy ang imbestigasyon ng mga awtoridad para malaman kung may ibang kasabwat ang suspek sa panloloko umano sa dayhuan.

— Ulat ni Ronilo Dagos

FROM THE ARCHIVES

Watch more News on iWantTFC
Bisitahin ang Patrol.PH para sa iba pang mga balita.