Drug suspect patay sa engkuwentro sa Nueva Ecija

ABS-CBN News

Posted at Aug 25 2020 02:55 PM

Patay ang isang lalaki matapos umanong makipagbarilan sa mga pulis sa buy-bust operation sa San Jose City, Nueva Ecija noong Lunes.

Kinilala ng San Jose police ang nasawing suspek bilang si Rafael Beltran, alyas "Apeng," na residente ng Cabanatuan City.

Nagkasa umano ng buy-bust operation laban kay Beltran matapos makatanggap ang mga awtoridad ng impormasyon sa pagdayo niya sa San Jose City para magtulak ng droga.

Nakaramdam umano ang suspek na pulis ang kaniyang katransaksiyon kaya naglabas siya ng baril at nauwi sa barilan ang operasyon.

Nakuha kay Beltran ang 8 pakete ng hinihinalang shabu, pistol, at motorsiklo.

Isa si Beltran sa mga notoryus na tulak ng ilegal na droga sa Nueva Ecija at mga karatig-lalawigan, sabi ng pulisya.

-- Ulat ni Lady Vicencio, ABS-CBN News

Bisitahin ang Patrol.PH para sa iba pang mga balita.