PatrolPH

Pansamantalang linya ng tubig inilalatag sa gilid ng bitak sa kalsada sa Pasig

Anjo Bagaoisan, ABS-CBN News

Posted at Aug 24 2021 06:44 AM

Watch more on iWantTFC

Nakatakdang ipaayos ang nasirang bahagi ng Topaz Road sa Ortigas Center, Pasig City kasunod ng paglitaw ng mahahaba, sanga-sanga, at malalalim na bitak sa kasagsagan ng ulan noong Linggo.

Magdamag nagtrabaho simula Lunes ang contractor ng Manila Water para ilatag sa gilid ng kalsada ang tinatawag na lifesaver pipeline.

Ito ang magiging daluyan ng tubig para sa 4 na condominium sa paligid ng sirang bahagi ng Topaz Road habang ginagawa ang kalsada.

Apektado ang mga gusaling East of Galleria, Cyberscape Beta, Cyberscape Gamma, at Glas Tower.

Dalawang oras pinutol ang pangunahing linya ng tubig mula alas-10 ng gabi hanggang hatinggabi para mailipat ito sa isa pang temporary waterline.

Ginawa na rin ito para tuluyang maisara ang daluyan ng tubig sa ilalim ng kalsada na tinitingnan kung nagkatagas.

Ayon sa supervisor ng contractor, target nilang magamit ang lifesaver pipeline Martes ng gabi. 

Kasama sa nakabantay buong gabi ang tauhan ng contractor ng Ortigas Land na nagpapatayo ng katabing gusali.

Hindi nagkaroon ng pagbabago sa mga bitak na bumuo mula noong Linggo, pero binabantayan kung maapektuhan ito kapag muling umulan.

Nitong Lunes inasahang isusumite kay Pasig Mayor Vico Sotto ang assessment report ng city engineer’s office na nag-imbestiga sa pinagmulan ng mga bitak kasama ang mga kinatawan ng Ortigas Land, Manila Water, Meralco at Barangay San Antonio.

Sabi ni barangay chairman Raymond Lising, una nilang nakikitang dahilan ng pagkabitak ay ang pagbasa ng lupa bunsod ng malakas na pag-ulan.

Iba pa sa mga tinitingnang anggulo ang pagbigay ng drainage system at ang epekto ng katabing construction site

Pinabulaanan naman ni Phivolcs Director Renato Solidum sa panayam sa media na mitsa ng mga bitak ang lindol o paggalaw ng fault.

Sinabi rin ng PAGASA na hindi maaaring kinidlatan ang kalsada dahil mas unang matatamaan ng kidlat ang mga matataas na gusali sa lugar. — May ulat ni Angel Movido, ABS-CBN News

Bisitahin ang Patrol.PH para sa iba pang mga balita.