PatrolPH

Sekyu na nakabisikleta sugatan matapos mabangga ng taxi

Anjo Bagaoisan, ABS-CBN News

Posted at Aug 24 2020 03:10 PM | Updated as of Aug 24 2020 08:52 PM

MAYNILA — Sugatan ang isang bicycle rider nang bumangga ang kanyang bisikleta sa isang taxi habang bumabaybay sa Elliptical Road sa kanto ng Quezon Avenue sa Quezon City nitong Lunes ng umaga. 

Kinilala ang biker na si Anthony Mark Leonor, 25, isang security guard sa QC Hall of Justice na papasok noon ng trabaho. 

Ayon kay Police Staff Sgt. Dexter Macavinta, investigator ng QC Traffic Sector 3, galing ang biker sa bagong-tayong bicycle lane sa outer lane ng Elliptical Road at tatawid sa kanto papuntang Quezon City Hall nang sumagi siya sa gilid ng taxi na lumiko ng Quezon Avenue. 

Watch more on iWantTFC

Ayon sa ina ni Leonor na si Annabelle, nagkapasa sa balakang ang biker nang tumama ang katawan niya sa likuran ng taxi at natumba sa kalsada. 

Dinala siya sa East Avenue Medical Center para sa paunang lunas at pinauwi rin pagkatapos. 

Sabi ng taxi driver na si Eduardo Roldan, 65, dahan-dahan ang kanyang takbo at hindi niya namalayan ang biker hanggang sa tumama na lang ito sa sasakyan. 

Iniimbestigahan pa ang insidente, pero ayon sa pulis, posibleng may nagpalit ng lane sa taxi o bisikleta. 

Handa namang makipag-areglo ang dalawang panig. 

Ayon kay QC Traffic Operations Division chief Dexter Cardenas, hindi pa kompleto ang mga bike lane barrier na unang ipinuwesto nitong weekend ng Department of Public Works and Highways.

Nagpapasalamat man sa paglagay ng mga barrier, inalala ng ilang biker ang kaligtasan nila sa mga tatawirang intersection. 

Mungkahi nila, padaanin na lang sila sa overpass o kaya pabantayan sa enforcer. 

Sabi ni Cardenas, kulang sila ngayon sa tao dahil sa COVID-19 pandemic kaya hindi maaaring malagyan ng mga enforcer ang lahat ng bike lane. 

Dagdag niya, pinag-uusapan pa nila ng Metropolitan Manila Development Authority (MMDA) ang magiging pinal na disenyo para sa mga bike lane at ang panuntunan sa pagdaan sa mga intersection. 

Paiigtingan na muna ng lokal na pamahalaan ang information drive para sa disiplina at pagbibigayan sa kalsada ng mga biker at ibang motorista. 

Bisitahin ang Patrol.PH para sa iba pang mga balita.