Ilang bahay sa Cataingan nalubog sa tubig matapos ang Masbate quake; tulong ipinanawagan

ABS-CBN News

Posted at Aug 20 2020 06:50 PM | Updated as of Aug 20 2020 07:12 PM

Nalubog sa tubig ang ilang bahay sa barangay Matayum sa kasagsagan ng lindol na tumama sa lugar. Photos courtesy: Fatima Dalanon

Humihingi ng tulong ang mga residente ng barangay Matayum sa Cataingan, Masbate matapos malubog sa tubig ang kanilang mga bahay matapos tumaas ang tubig-dagat sa kasagsagan ng lindol na tumama sa lugar. 
 
Ayon sa mga residente, halos lagpas-tuhod ang tubig sa loob ng mga bahay. 

Pero may mga lugar na lagpas baywang na ang tubig-dagat. 

Watch more in iWant or TFC.tv

Isa ang bahay ni Fatima Dalanon sa mga lumubog dala ng lindol. Nagkabitak-bitak din ito. Kuwento niya, matapos ang lindol ay sumunod ang pagtaas ng tubig sa dagat. 

Bumaba noong Miyerkoles ang tubig at tumaas ulit nitong Huwebes, ayon kay Dalanon. 

Halos abot-baywang naman ang tubig sa daanan ng residenteng si Jenexelle Repana. 

Dahilan ito para humingi na sila ng tulong. 

“Nananawagan po kami diyan sa kapwa kababayan namin na sana matulungan po kami dito sa aming lugar kung saan [naganap] yung malakas na lindol kaya humihingi po kami sa inyo ng tulong,” ani Repana. 

Mahirap para kay Ruby Gail Repana ang sitwasyon dahil bukod sa sira na ang kanilang bahay ay pataas pa ang tubig dito. 

Una nang sinabi ng Phivolcs na nagkaroon ng subsidence o pagbaba ng lupa dala ng lindol. 

Sina Bernadeth Talisic napapaiyak dahil wala na silang kita sa pangingisda at kailangan pa nila ng lote na mapagtitirikan ng bahay.

Hangad din nina Marelyn Tapaya at Elisa Repana na may makatulong sa kanila para makalipat sa mas mataas na lugar. 

Inabot na ng tubig-dagat ang bahay nina Repana kaya kahit anong tulong ay malaking bagay na umano sa kanila. 

Namigay na ang Department of Social Welfare and Development ng 150 food packs sa mga apektadong residente.

Nagbigay rin sila ng P5,000 financial assistance sa 21 pamilyang nawalan ng bahay. 

May tulong din na ibibigay sa mga kabahayang bahagyang napinsala ng lindol.

Dumating naman ang dagdag na 400 food packs, family tents at mga laminated sacks para sa mga nasalanta. 

— Ulat ni Jose Carretero, ABS-CBN News

Bisitahin ang Patrol.PH para sa iba pang mga balita.