PatrolPH

50 pamilya nasunugan sa Pasay City

Anjo Bagaoisan, ABS-CBN News

Posted at Aug 19 2022 12:11 AM

Nasa 50 pamilya ang nawalan nang tirahan nang matupok ang hindi bababa sa 13 magkakatabing bahay at paupahan sa sunog sa Barangay 113, Pasay City noong Huwebes ng gabi.

Ayon sa Bureau of Fire Protection, tumagal nang mahigit isang oras ang sunog na tumama sa loobang bahagi ng mga bahay sa Dimasalang Street.

Inakyat sa ikalawang alarma ang responde.

Naapula ang sunog bandang alas-8:15 ng gabi.

Sabi ni Fire Sr. Insp. Cid Vincent Manaig, ang chief of operations ng Pasay City fire station, nagmula umano ang sunog sa isang kuwarto ng paupahan.

“Based sa mga na-interview natin, mula daw ito sa bahay ng isang tricycle driver. Ang statement nila ay naiwan umano ‘yong electric fan na nakasaksak doon. So ‘yon ang isa sa mga tinitingnan nating anggulo. Hindi pa rin isinasantabi ng BFP Pasay ang iba pang possible cause ng apoy,” sabi ni Manaig.

Buti na lang aniya nasa dulo ito ng eskinita kaya nakalikas pa ang mga residente bago kumalat ang apoy.

Namamasada ang tricycle driver na si Arnold Lisondra nang magkasunog.

“Binaba ko pasahero ko, umikot ako, dumiretso na ako. Pagpunta ko dito, hanggang dito na ang apoy. ‘Yong gamit ko wala na akong naisalba,” kuwento niya.

Namatay din ang tanging kasama sa bahay ng biyudong si Lisondra—ang 16-buwang gulang niyang asong Husky Akita na si Happy.

“Blangko pa ako, ‘di makasalita. Kung ano’ng gusto ko wala akong masabi. Tulala ako kasi ‘yong isang aso na alaga ko talaga, unang-una may sakit kasi ako,” sabi niya.

“Sa ngayon bibiyahe na lang siguro muna ako ng tricycle tapos bukas saka na ako babalik kung anuman ang maabutan.”

Mahigit isang oras matapos magdeklara ng fire out, nagkagulo ang mga residente nang kumalat na may sumiklab na sunog sa iba pang bahagi ng Dimasalang ilang bahay mula sa nasunugan.

Nagmadali ang mga residente na lumikas mula sa looban sa pamamagitan ng maliit na bukana.

Tumulong din ang iba na maglatag ng firehose habang lumapit ang mga firetruck.

Pero nahinto rin ang komosyon nang malaman ng mga bombero na false alarm ito.

Ayon sa BFP, tinatayang P125,000 ang paunang halaga ng natupok.

Pansamantalang inilikas ang mga nasunugan sa isang kalapit na eskinita.

Ayon sa barangay, bibigyan sila ng pagkain, matitirhang tolda, at iba pang tulong.

Bisitahin ang Patrol.PH para sa iba pang mga balita.