PatrolPH

Halos P5 milyong halaga ng marijuana sinira sa Benguet

Anjo Bagaoisan, ABS-CBN News

Posted at Aug 17 2021 06:36 AM

Watch more on iWantTFC

MAYNILA—Sinunog ng mga pulis at tauhan ng Philippine Drug Enforcement Agency (PDEA) ang libo-libong halaman at kilo-kilong pinatuyong marijuana sa loob ng 2 araw na marijuana eradication operation sa bayan ng Bakun, Benguet. 

Ayon sa Philippine National Police, nadiskubre ang taniman ng marijuana na may lawak na 800 square meters sa Sitio Lengyatan at Sitio Dacap sa Barangay Kayapa noong Sabado. 

Pinagbubunot doon ang nasa 6,400 na malalaking halaman na may street value na P1.28 milyon.

Nadiskubre pa sa lugar ang nasa 30 kilo ng mga dried marijuana stalks na nasa P3.6 milyon ang tinatayang halaga.

Walang nahuling suspek sa operasyon at nagsasagawa ng followup operation laban sa mga nasa likod ng taniman. 

Nahaharap sa panghabambuhay na pagkakulong at multa ng hanggang P10 milyon ang sinuman ang nasa likod ng operasyon.

Ilang araw rin ito matapos ang isa pang operasyon sa Sitio Legab at Sitio Giligil sa parehong bayan na nakadiskubre at nagsunog ng 2 taniman ng halos P1 milyong halaga ng marijuana.

Bisitahin ang Patrol.PH para sa iba pang mga balita.