PatrolPH

Grupo ng mga guro di kuntento sa planong ipagawa lang ang mga laptop mula DepEd

ABS-CBN News

Posted at Aug 11 2022 11:37 AM | Updated as of Aug 11 2022 07:26 PM

Watch more News on iWantTFC

(UPDATE) Hindi kuntento ang 2 grupo sa plano ng Department of Education (DepEd) na ipagawa na lang ang mga inirereklamong mabagal na laptop na inisyu sa mga guro.

Nais ng Alliance of Concerned Teachers (ACT) na may managot sa pagbili kaya naman sumugod sila nitong umaga ng Huwebes sa tanggapan ng Department of Budget and Management (DBM) para mag-protesta.

Ang Procurement Service ng DBM o PS-DBM kasi ang nagsagawa ng procurement ng laptop para sa DepEd.

Para sa ACT, hindi sapat ang solusyon ng DepEd na gamitin ang warranty ng mga laptop para ma-upgrade o mapalitan ang mga ito. Band-aid solution lang anila ito sa palpak na pagkakabili ng gadgets.

Kung nais ng gobyerno na mabigyan ng kalidad na edukasyon ang mga kabataan, dapat ibinibigay ang tamang gamit at hindi ang mga palyadong laptop, ayon sa ACT.

Nanawagan din ang grupo sa DepEd na kung maglalaan ulit ng pondo para sa learning materials, dapat may kinatawan ang mga guro na makapagbibigay ng payo o gabay.

Hindi rin sapat para sa Teachers' Dignity Coalition (TDC) ang planong ipagawa o palitan ang mga laptop, ayon sa national chairperson na si Benjo Basas.

Sa panayam ng Teleradyo noong gabi ng Miyerkoles, sinabi ni Basas na kailangang imbestigahan pa ring mabuti kung may dapat managot sa pagbili ng mga laptop na inilarawan sa Commission on Audit (COA) report na "pricey" o mahal ang bili pero "outdated."

"Napaka-importante talaga na magkaroon talaga dito ng impartial at malalimang investigation," ani Basas.

Nauna nang sinabi ng DepEd na kapag napatunayan nitong mabagal nga ang mga inisyu na laptop, igigiit nito ang warranty provision kung saan maaaring ma-upgrade ang specification o mapalitan ang mga laptop.

Sa hiwalay na panayam, nangako naman ang DepEd na tututukan nila ang isyu at aalamin ang tunay na nangyari sa pagbili ng mga sinasabing overpriced na laptop.

Ayon kay DepEd Spokesperson Michael Poa, hinihintay na lang nila ang kaukulang mga dokumento mula PS-DBM para masagot ang naturang isyu sa COA.

Sa Senado, naghain naman ng resolusyon si Sen. Aquilino "Koko" Pimentel III para imbestigahan ng Blue Ribbon Committee ang procurement ng mga laptop.

— May ulat nina Joyce Balancio at Sherrie Ann Torres, ABS-CBN News

 RELATED VIDEO

Watch more News on iWantTFC
Bisitahin ang Patrol.PH para sa iba pang mga balita.