2-anyos na bata sa Negros Oriental positibo sa COVID-19

Mitch Lipa, ABS-CBN News

Posted at Aug 11 2020 07:01 AM

Isang 2-anyos na bata ang kasama sa 4 na bagong COVID-19 cases na naitala sa Negros Oriental, ayon sa mga health officials ng lalawigan nitong Lunes.

Ayon kay Dr. Liland Estacion, ang assistant provincial health officer ng Negros Oriental, ang bata ay residente ng bayan ng Siaton. Kasama ng bata ang kaniyang mga magulang at isa pang kapatid na dumating sa Dumaguete City noong Hulyo 31 sa pamamagitan ng Malasakit Voyage.

Isinailalim sa swab test noong Agosto 1 ang buong pamilya at ang bata ang nagpositive sa virus. Kasama ng bata sa isolation area ng rural health unit ng Siaton ang kaniyang ina.

Bukod sa kaniya, isang 48-anyos na lalaki na taga-Tayasan, isang 31-anyos na lalaki na taga-Dauin, at isang 36-anyos na babae na taga Sibulan ang kasama sa bagong kaso sa lalawigan.

May 108 na COVID-19 cases na ang naitala sa Negros Oriental at 16 dito ang active infections.