PatrolPH

Metro Manila LGUs naglatag ng mga panuntunan sa pamimigay ng ayuda

ABS-CBN News

Posted at Aug 10 2021 04:26 PM | Updated as of Aug 10 2021 07:00 PM

Watch more on iWantTFC

(UPDATE) Tiniyak ngayong Martes ng ilang mayor sa Metro Manila na may mga nakalatag silang mga panuntunan para matiyak na magiging ligtas ang pamamahagi ng ayuda simula Miyerkoles.

Ayon kay San Juan City Mayor Francis Zamora, limitado lang sa hanggang 100 benepisyaryo ang maaaring pumunta sa payout site kada oras sa bawat barangay para matiyak na hindi dadagsa ang mga tao. 

"Magkakaroon ng kaniya-kaniyang serial number ang mga benipisyaryo. Halimbawa, ang 10 a.m. to 11 a.m., si number 001 hanggang number 100 lamang, and so on and so forth," paliwanag ni Zamora sa Palace briefing. 

Nasa P101 milyon ang inilaan ng national government para sa ayudang ipamamahagi sa mga taga-San Juan na labis na apektado ng pagbabalik ng Metro Manila sa enhanced community quarantine.

Nasa P1,000 ang maaaring makuha ng kada benepisyaryo habang hanggang P4,000 kada pamilya.

Ayon kay Zamora, gagamitin ng local government unit (LGU) ang parehong listahan ng mga benepisyaryo sa nagdaang lockdown nitong taon.

"Sakali ho mayroong gustong magpalista sa tinatawag na grievance list, meron naman ho 'yan," ani Zamora.

"Sakali ho hindi lahat nag-claim nitong P101 million natin, that means we will have a surplus of funds, we can now use this para naman sa mga magpapalista sa grievance committees," dagdag niya.

Pinayuhan naman ni Mandaluyong Mayor Menchie Abalos ang kaniyang mga nasasakupan na antabayanan sa social media page ng LGU ang mga detalye sa pamamahagi ng ayuda.

Magiging mahigpit aniya ang LGU sa schedule ng mga benepisyaryo para matiyak na masusunod ang mga health protocol kontra COVID-19.

"Hindi po lahat dapat pumunta sa atin pong pagpapaayuda, may oras sila, mayroon silang araw," ani Abalos.

Sa Pateros, magsisimula ang pamamahagi ng ayuda sa 2 barangay, ani Mayor Miguel Ponce.

Nasa 120 benepisyaryo lang ang papayagan sa payout site sa loob ng isa at kalahating oras. 

"Ang ginawa po natin dito ay magbubukas po tayo ng payout sites at hinati natin ang bawat payout sites sa 5 timeslots," ani Ponce.

Sa Maynila, handa na umano ang mga opisyal ng barangay sa pamimigay ng ayuda.

Bukod pa sa ayudang galing sa national government, mamimigay rin ang LGU ng food packs para sa mga taga-Maynila.

Sa Quezon City, maglalabas ng listahan ang bawat barangay sa Facebook page o official account nila, kung saan malalaman ang araw at oras para makuha ang ayuda.

Sa Caloocan, sinabi ni Mayor Oscar Malapitan na kung sino ang mga nakatanggap ng ayuda noong nakaraang ECQ, sila pa rin ang mabibigyan ng tulong.

May matatanggap na text ang mga naka-schedule na kukuha ng ayuda pero kung nagpalit ng cellphone number ang benepisyaryo, puwedeng makita ang schedule sa city hall o mga barangay.

Magiging hybrid naman ang isilo ng pamimigay sa Parañaque, ani Mayor Edwin Olivarez.

Puwedeng ipasok ang ayuda sa mga dati nang may e-wallet o G-cash.

Kung walang e-wallet, puwede namang kuhanin nang face-to-face pero isa lang ang puwedeng pumunta sa distribution site kada pamilya.

Sa Pasay, ibababa naman sa bawat barangay ang pamamahagi ng ayuda sa mga residente, ayon kay Mayor Emi Calixto Rubiano.

Nasa 60 disbursing officer ang pupunta sa mga benepisyaryo katuwang ang barangay officials para maiwasang dumagsa sa venue.

Sa Pasig, may roving team na magha-house-to-house para mamigay ng forms para sa ayuda at bakuna.

Papupuntahin ang mga ito sa distribution center, na tig-2 sa bawat barangay.

Sa Navotas, ipo-post naman sa Facebook page ang pangalan ng mga benepisyaryo at schedule ng pagkuha ng ayuda.

Mananatili sa ECQ ang Metro Manila hanggang Agosto 20. Ipinatupad ang paghihigpit dahil sa pagsipa sa mga kaso ng COVID-19.

— Ulat nina Pia Gutierrez at Doris Bigornia, ABS-CBN News

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.