PatrolPH

Pagbabakuna sa Tanza, Cavite suspendido; vaccine team positibo sa COVID-19

Michael Delizo, ABS-CBN News

Posted at Aug 10 2021 01:09 PM | Updated as of Aug 10 2021 07:28 PM

Watch more on iWantTFC

(UPDATE) Sinuspinde simula ngayong Martes ang pagbabakuna kontra COVID-19 sa bayan ng Tanza, Cavite matapos magpositibo sa COVID-19 ang ilang miyembro ng vaccination team, kahit ang ilan sa mga ito ay fully vaccinated na. 

Ayon kay Tanza Municipal Health Officer Dr. Ruth Punzalan, 18 ang positibo sa COVID-19, kabilang ang 7 nurse at midwife na nagsisilbing vaccinator at 11 barangay health worker. 

Hinihintay pa ang resulta ng ibang isinailalim sa swab test.

Ayon kay Punzalan, walang sintomas ng sakit ang mga nagpositibo habang ang iba ay nilagnat o sinipon. 

"[I am] reminding vaccinees na sana 'pag may nararamdaman sila kahit mild sign ng cold, cough, fever, pananakit ng katawan, 'wag sana po nilang i-ignore. Sabihin nila sa screener," ani Punzalan. 

"May mga ilang na-vaccinate kami na hindi nagsabi ng totoo na kinabukasan, nagkaroon sila ng COVID," dagdag ng doktor. 

Sisikapin umanong maipagpatuloy ang pagbabakuna sa mga darating na araw pero limitado lang ang mga tauhan at sa isang vaccination site lang.

Humihingi na rin ang lokal na pamahalaan ng Tanza sa Department of Health ng dagdag na health workers. 

"Naapektuhan talaga ang schedule namin. So we are cancelling our schedule for tomorrow and Thursday until magkaroon kami ng malinaw na workforce. Hindi kasi kami maka-commit," ani Punzalan.

Ayon kay Punzalan, ramdam na ang paglobo ng mga kaso ng COVID-19 sa buong lalawigan dahil nahihirapan nang makapag-admit ng bagong pasyente ang mga ospital.

Apektado rin ang ilang programang pangkalusugan dahil ilan sa mga nagpositibong miyembro ng vaccination team ang nangunguna rito.

"Sa Cavite, full house lahat ang mga hospitals. So, dumami nga 'yong beds namin kasi may mga ibang pasyente kami na kahit ipila namin sa hospital, wala pong bakante, wala kaming mgagawa," ani Punzalan. 

May 353 na aktibong kaso ng COVID-19 sa Tanza sa tala ngayong Martes. 

Samantala, ini-lockdown naman ang 2 subdivision sa General Trias City dahil sa pagdami ng mga tinatamaan ng COVID-19.

Mula Agosto 10 hanggang 20, naka-lockdown ang Phase 2 ng Tierra Solana Subdivision sa Barangay Buenavista III at Holiday Homes Subdivision sa Barangay Biclatan.

Maglalagay ng checkpoint ang mga awtoridad para matiyak na ang mga awtorisadong indibidwal lang ang lalabas.

Bawal din bumisita at bawal pumasok ang mga delivery rider, at bawal din ang pagbebenta at pagkonsumo ng alak.

Magkakaroon din ng curfew mula alas-7 ng gabi hanggang alas-4 ng madaling araw.

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.