PatrolPH

Presyo ng asukal, bumaba sa ilang pamilihan pero nasa P100 pa rin

Lady Vicencio, ABS-CBN News

Posted at Aug 08 2022 02:31 PM | Updated as of Aug 08 2022 04:11 PM

(UPDATE) Nabawasan na ang presyo ng asukal sa ilang pamilihan sa Metro Manila pero hindi pa rin ito bumababa sa P100 kada kilo.

Sa Mega Q Mart sa Quezon City, halimbawa, P100 na ang kada kilo ng refined sugar habang P75 nag brown at washed sugar.

Ayon sa mga nagtitinda, tumumal ang bentahan noong nakaraang linggo nang pumalo sa P105 ang kada kilo ng refined sugar.

"No choice naman sila pero mabigat na talaga sa bulsa," anang tindera ng asukal na si Irene Javien.

Dahil dito, tiis-tiis muna ang mga bumibili ng asukal, lalo na ang mga may negosyong ginagamit ito bilang sangkap.

Sa tindahan ng buko juice ni Esther del Mundo, umaabot nang 10 kilong asukal ang nagagamit kada araw.

"Ang ginawa ko na lang po, nagbawas na lang ako [ng nilalagay na asukal]... hindi naman puwedeng hindi kami gagamit ng asukal kasi palamig 'yan, tatabang 'yan," ani del Mundo.

Ayon sa Sugar Regulatory Administration (SRA), 3 sugar millers ang tumatanggap na ng tubo para iproseso bilang asukal.

Inaasahang maibabagsak na ito sa merkado sa loob ng 1 hanggang 2 linggo.

Pero inaayos pa rin umano ng Sugar Board ang Sugar Order para makapg-angkat ng asukal dahil sa kakulangan sa suplay at para mapababa ang presyo sa mga pamilihan.

Pinakikiramdaman naman ng United Sugar Producers Federation (UNIFED) kung kayang sabayan ng local sugar producers ang presyo ng imported na asukal na iaangkat ng SRA.

"'Pag bagsak ng 300,000 metric tons, medyo mabigat ‘yan. Baka babaa ang presyo ng producers," ani UNIFED President Manuel Lamata.

Para maiwasang malugi ang mga lokal na producer, iminungkahi ng UNIFED ang P90 kada kilo na standard retail price sa asukal.

Mas mataas ang nasabing presyo sa suggested retail price na itinakda, ilang taon na ang nakakalipas.

"Actually we have an existing SRP. The SRP has been there for the longest time. Maybe 15 years or more. Before this short or tightness of supply, we have P50 on refined. But this time around, kasi nafi-feel talaga ng merkado ang tightness ng suplay, mataas ang demand, siyempre papalo 'yong presyuhan sa merkado," ani SRA Administrator Hermenegildo Serafica.

Sa mga susunod na araw, inaasahang maglalabas ang SRA ng Sugar Order para sa iaangkat na asukal.

Sinabi ni Serafica na hindi na lang industrials ang makikinabang sa importasyon at magiging patas ang distribusyon sa mga konsumer.

RELATED VIDEO

Watch more News on iWantTFC
Bisitahin ang Patrol.PH para sa iba pang mga balita.