ALAMIN: Fabella Hospital tumatanggap ba ng COVID-19 patients?

ABS-CBN News

Posted at Aug 05 2020 03:42 PM

MAYNILA — Nilinaw ng Dr. Jose Fabella Memorial Hospital nitong Miyerkoles na tumatanggap pa rin sila ng mga manganganak na may COVID-19, pero hindi sa lahat ng pagkakataon. 
 
Paliwanag ni medical center chief Dr. Esmeraldo Ilem, tanging mga manganganak na mild at asymptomatic COVID-19 cases lang ang tinatanggap nila.

"Handa po kami sa COVID-19. Handa po kami sa tinatawag na surge. 'Yung sinasabi po na dapat 30 percent of our bed capacity should be allotted for COVID-19, ine-expand po namin ngayon sa 50 percent," ani Ilem.

Inire-refer naman sa ibang ospital ang moderate at severe cases.

Ayon kay Ilem, may hiwalay silang isolation area na may sariling labor room, delivery room, at operating room.
    
May naka-assign ding hiwalay na health workers sa isolation area.
    
Sabi ni Ilem, problema lang nila kapag hindi sinasabi ng pasyenteng manganganak na positibo sila sa COVID-19 dahil sa takot na baka tanggihan sila.

Sa ngayon, may 7 kaso ng COVID-19 sa ospital.

Bisitahin ang Patrol.PH para sa iba pang mga balita.