4 na inaresto matapos magprotesta sa Pandi, Bulacan noong SONA, nakalaya na

Arra Perez, ABS-CBN News

Posted at Aug 05 2020 06:09 PM

MAYNILA - Nakalaya na ang apat na babaeng inaresto sa Pandi, Bulacan nang magprotesta noong State of the Nation Address ni Pangulong Rodrigo Duterte noong Hulyo 27.

Nabigyan na ng release order ang apat na babaeng miyembro ng Kadamay.

Sa pahayag ng kanilang grupo, Miyerkoles nang inilabas ang release order para kina Janet Villamar, Trixie Trenuela, Marilou Amaro at Edmylyn Gruta, na tinaguriang "Pandi 4".

Sinabi ng Kadamay na walang basehan ang kasong isinampa laban sa mga nag-online protest.

Ayon sa grupo, wala silang ginawang ilegal, at pawang pananakot sa mga aktibista at kritiko ang nangyari.

Plano ng Kadamay na magsampa ng counter-charge sa mga pulis.

Sinubukan ng ABS-CBN News na kunin ang panig ng Pandi Police pero wala pa silang tugon.

Sa pahayag na inilabas noong July 28, sinabi ng Bulacan Police na namataan ng nagpapatrolyang pulis na nagkilos protesta ang mga miyembro ng Kadamay.

Pinayuhan umano silang umuwi dahil walang naipakitang permit, pero sa halip na sumunod, tinulak nila ang mga pulis, na nag-resulta sa pag-aresto.

Bisitahin ang Patrol.PH para sa iba pang mga balita.