PatrolPH

Jose Faustino, itinalaga bilang ika-56 na AFP chief of staff

Wheng Hidalgo, ABS-CBN News

Posted at Jul 31 2021 06:17 PM | Updated as of Aug 01 2021 08:17 PM

Jose Faustino, itinalaga bilang ika-56 na AFP chief of staff 1
Ika-56th na Chief of Staff ng AFP na si Lt. Gen. Jose Faustino Jr.

MAYNILA—Iniupo na nitong Sabado bilang ika-56 na Armed Forces of the Philippines (AFP) Chief of Staff si Lt. Gen. Jose Faustino Jr. matapos palitan si Gen. Cirilito Sobejana, na pormal nang nagretiro.

Sa change of command sa Camp Aguinaldo, pinangunahan ni Defense Secretary Delfin Lorenzana ang pagpapalit ng liderato. 

Binati niya ang 2 heneral na kanya umanong pinagkakatiwalaan sa pamumuno ng Sandatahang Lakas ng Pilipinas. 

Dumalo rin ang ilang kalihim na mga dati ring Chief of Staff ng AFP gaya nina National Security Adviser Sec. Hermogenes Esperon, at Presidential Adviser on Peace Process Sec. Carlito Galvez. Dumalo rin sa turnover si PNP Chief Gen. Guillermo Eleazar. 

Sa pagreretiro ni Sobejana, kinilala ang kaniyang 38-taong serbisyo sa AFP. Sinabi niya na ang pagtatapos ng kaniyang serbisyo sa sandatahang lakas ay hindi katapusan ng kaniyang pagsisilbi sa bayan. 

Watch more on iWantTFC

Ibinida niya ang AFP modernization kung saan ang mga nabiling gamit ay nagagamit nila para sa proteksyon ng teritoryo ng Pilipinas. Nagagamit din daw ang mga ito sa laban kontra terorismo para matapos na ang local armed conflict.

Pinasalamatan niya si Pangulong Rodrigo Duterte at Lorenzana sa tiwala at wala umanong sawang suporta. Kinilala rin niya ang mga sakripisyo at serbisyo ng lahat ng sundalo na patuloy na lumalaban para sa kapayapaan sa Pilipinas. 

Sa pag-upo naman ni Faustino, sinabi niya na tututukan niya ang misyon ng AFP na supilin ang insurgency, terorismo at komunismo sa bansa. Itutuloy rin niya ang programa sa AFP modernization at hihilingin ang pagkakaroon ng self-sufficient programs na kakayaning protektehan ang teritoryo ng Pilipinas. 

Patuloy rin niyang gagawin ang koordinasyon sa PNP para masawata ang krimen. 

Si Faustino ay miyembro ng PMA Maringal Class of 1988 at nakatakdang magretiro sa November 12 base na rin sa mandatory retirement age na 56. 

Sa dulo ng seremonya ay nagpadala ng video message si Duterte kung saan nagpasalamat siya at kinilala ang serbisyo ni Sobejana.

Sa panayam kay Lt. Gen. Faustino, sinabi niya na maswerte siya na ang sinundan niyang Chief of Staff ay si Sobejana dahil nakalatag na ang kampanya kontra terorismo at itutuloy na lang ang nasimulan na. Malaking tulong din daw ang National Task Force to End Local Communist Armed Conflict o NTF ELCAC sa pagresolba ng insurgency problem ng bansa. 

Prayoridad ni Faustino na mapalakas ang defense capabilities ng AFP para protektahan ang teritoryo ng Pilipinas.

Gusto rin niyang matiyak na mababakunahan ang marami pang sundalo. Sa ngayon daw kasi ay wala pa sa kalahati ng sandatahan ang bakunado. Bago raw sana matapos ang third quarter ay madagdagan pa ang mga mababakunahan para handa sila at protektado saan man sila madeploy.

Bisitahin ang Patrol.PH para sa iba pang mga balita.