Nasa P6.8 milyong halaga ng shabu nasabat sa Parañaque

Anjo Bagaoisan, ABS-CBN News

Posted at Jul 31 2020 06:05 AM

MAYNILA - Nasabat ng mga tauhan ng Philippine Drug Enforcement Agency (PDEA) ang nasa P6.8-milyong halaga ng shabu sa buy-bust operation sa Bgy. Dionisio, Parañaque City nitong Huwebes ng hapon. 

Nakuha ang tinatayang 1 kilo ng shabu mula sa 2 lalaki at isang babae na target ng operasyon ng PDEA Special Enforcement Service, PDEA NCR Southern District Office at ng Parañaque City Police. 

Nasa plastic na pouch ang shabu na isinuot sa lalagyan ng green tea, isa sa karaniwang nahuhuling lalagyan ng ganitong karaming halaga ng shabu. 

Sa ulat ni PDEA spokesperson Derrick Carreon, nakipagkita ang mga PDEA agent sa mga suspek na sina alias Bai, Kali, at Marvin sa gasolinahan sa Ninoy Aquino Avenue. 

Pinambayad sa kanila ang boodle money bago inaresto. 

Nakuha rin sa kanila ang isang caliber .38 na baril at ang lulan na motorsiklo. 

Nahaharap ang mga inaresto sa kasong paglabag sa Comprehensive Dangerous Drugs Act of 2002. 

Bisitahin ang Patrol.PH para sa iba pang mga balita.