PatrolPH

Metro Manila balik-ECQ mula Agosto 6-20; dine-in bawal mula Hulyo 31

ABS-CBN News

Posted at Jul 30 2021 01:38 PM | Updated as of Jul 30 2021 08:24 PM

Metro Manila balik-ECQ mula Agosto 6-20; dine-in bawal mula Hulyo 31 1
Pagsasailalim sa isang barangay sa Pasay sa Enhanced Community Quarantine noong Pebrero 2021. Jonathan Cellona, ABS-CBN News/File

MAYNILA - Ibabalik sa enhanced community quarantine (ECQ) ang Kamaynilaan simula Agosto 6, kasabay ng pagdami ng mga kaso ng COVID-19 at maging ang banta ng Delta variant sa lugar. 

Kasunod ito ng paghihimok ng ilang opisyal at eksperto na gumawa ng mga dagdag na hakbang para mapigilan ang pagkalat ng Delta variant gaya ng mga mas mahigpit na lockdown. 

Watch more on iWantTFC

Ang ECQ ang pinakamahigpit sa quarantine classifications na ipinapatupad ng gobyerno kung saan mga essential lang na mga negosyo ang papayagang magbukas. Ito na ang ikatlong beses na inilagay ang Metro Manila sa ECQ sa kasagsagan ng pandemya. 

Unang beses na inilagay ang Kamaynilaan sa ilalim ng ECQ noong Marso 2020 o sa unang bahagi ng pandemya sa pagpapatupad ng ECQ sa Luzon, at sumunod naman noong Marso nitong 2021, nang magkaroon ng surge sa Kamaynilaan at sa mga karatig-lugar nito o ang tinatawag na "NCR Plus Bubble." 

"Matapos ng matinding debate, kinakailangan magkaroon ng desisyon, masakit na desisyon po natin 'to dahil alam natin na mahirap ang ECQ pero kinakailangang gawin ito para maiwasan 'yung kakulangan ng ating mga ICU beds at iba pang hospital requirements kung lolobo po talaga ang kaso dahil nga po sa Delta variant," ani Presidential Spokesperson Harry Roque. 

"Sa huli, ang inisip ng lahat ay ang kailangang gawin; ang hirap na desisyon na ito para mas maraming buhay ang maligtas," dagdag niya. 

Matatandaang nagkaroon ng agam-agam ang Department of Health, ang ilan pang ahensiya at mga grupo ng mga negosyante sa pagpapatupad ng mga lockdown dahil sa mga posibleng epekto nito sa ekonomiya. 

Watch more on iWantTFC

Bukod dito, simula Hulyo 31 ay bawal na ang indoor dine-in, at al fresco. 

Pero hanggang Agosto 5 ay magpapatuloy na makakapag-operate ang personal care services gaya ng salons at spas at outdoor tourist attractions. 

Magpapatuloy rin ang outdoor tourist attractions hanggang 30 porsiyento capacity. Limitado na rin sa virtual o online ang religious gatherings, habang mga malapit na kaanak na lang ang papayagan sa mga libing at lamay. 

Mga authorized person outside residence na lang din ulit ang papayagang lumabas sa NCR Plus Area. Magpapatuloy namang maging operational ang public transportation. 

Ayon kay Roque, mas mabuti nang maghigpit dahil kung hindi gagawa ng aksiyon ay dadami pa ang COVID-19 cases sa susunod na buwan. 

Sinabi din ni Roque na mas mainam na lang maghintay ng anunsiyo tungkol sa inaasahang ayuda sa simula ng ECQ sa NCR sa susunod na Biyernes. 

"Alam niyo ang presidente naman paulit-ulit na sinasabi, hindi siya pumapayag sa ECQ na walang ayuda. So sigurado po ako magkakaroon ng ayuda, hayaan lang po natin na magkaroon ng opisyal na kumpirmasyon ang ating DBM. Ang nangyari naman po sa Iloilo at saka doon sa Cagayan de Oro, binigyan din po sila ng ayuda na P1,000 kada tao," ani Roque. 

Nabanggit noong nakaraang Martes ng OCTA Research na aabot na sa higit 1,000 ang naitatalang COVID-19 cases kada araw mula sa nasa 600. 

NAGHAHANDA NA 

Sinabi naman ng Metro Manila Council o samahan ng mga alkalde sa Kamaynilaan na handa na sila sa pagpapatupad ng ECQ. 

Ayon kay MMC chairman at Parañaque Mayor Edwin Olivarez, pabor sila rito dahil sa pagtaas ng COVID-19 cases. Pero hiling nila ay dagdag pang suplay ng mga bakuna sa lokal na pamahalaan para puspusan ang pagbabakuna habang naka-lockdown. 

Ayon pa kay Olivarez, handa silang mag-house to house para mas marami ang mababakunahan. 

"To be effective po talaga itong ating ECQ kailangan natin 'to 14 days po talaga, it's 2 weeks po talaga ang kailangan po natin para magawa natin 'yung lahat ng contact tracing, 'yung testing natin, vaccination po natin," ani Olivarez. 

Handa na rin umano ang mga LGU na magbigay ng ayuda sa mga maaapektuhan ng lockdown pero umaapela sila ng tulong sa national government. 

Kabilang na sa mga naghahanda sa ECQ ang lungsod ng Maynila, kung saan ang ilang barangay officials ay nagpapaalala na sa mga residente na paghandaan ang ECQ. 

Ang ilang residente, gaya ni Josefina Fernando, ay nangangamba dahil apektado rito ang kanilang kabuhayan kaya panawagan nila na mamigay ng ayuda bago ipatupad ang lockdown. 

"Ako lang matanda sa 'min para mamalengke para lumabas kaya mahirap kaya sana bago mag-lockdown kung may pera para bibilhin na lahat," ani Fernando. 

Ayon sa LGU ng Maynila, bahagyang tumaas ang kaso ng COVID-19 sa lungsod, maging ang bed capacity occupancy rate sa mga ospital. 

Ang Quezon City, mahigit 3,000 contact tracers ang pinapagalaw dahil sa pagtaas ng kaso. 

Aabot sa 15 lugar ang naka-lockdown, kabilang ang Barangay Culiat na may 17 kaso ng COVID-19. 

Nagkaroon din ng pamamahagi ng ayuda sa lungsod. Ayon kay Quezon City Mayor Joy Belmonte, aabot sa 750,000 pamilya ang kailangang ayudahan. 

Pinalakas ng Makati ang kanilang contact tracing, habang nagpapatupad naman ng paghihigpit ang ilan pang lungsod gaya Pateros, at Paranaque. 

-- May mga ulat nina Pia Gutierrez at Zyann Ambrosio, ABS-CBN news

Bisitahin ang Patrol.PH para sa iba pang mga balita.