Van wasak matapos bumangga sa concrete barrier sa Commonwealth; 2 sugatan

Jervis Manahan, ABS-CBN News

Posted at Jul 30 2020 03:46 AM

MAYNILA - Wasak ang isang van matapos maaksidente sa kahabaan ng Commonwealth, Quezon City Huwebes ng hatinggabi.

Sugatan ang driver at pasahero nito na parehong lasing, ayon sa responder mula sa Metropolitan Manila Development Authority.

Mabilis umano ang takbo ng van na bumangga sa concrete barrier na nagsisilbing harang sa ginagawang MRT-7. Sa lakas ng impact, nahulog ang concrete barrier sa hukay sa construction site ng MRT.

Agad dinala sa East Avenue Medical Center ang dalawang lalaki, na may mga sugat at galos sa iba't ibang bahagi ng katawan.

Walang naipakitang lisensya ang driver ng sasakyan. Makakasuhan siya ng damage to public property.

Wala namang ibang sasakyang nadamay sa insidente.

Bisitahin ang Patrol.PH para sa iba pang mga balita.