PatrolPH

Bilang ng mga nasawi sa bumagsak na tulay sa Cavite, umakyat sa 8

Dennis Datu, ABS-CBN News

Posted at Jul 28 2022 04:26 PM


Umakyat na sa walo ang bilang ng mga nasawing kabataan matapos bumagsak ang isang lumang tulay sa Dasmariñas City, Cavite.

Pasado alas-2 ng hapon ngayong Huwebes nang matagpuan ng mga diver mula sa Philippine Coast Guard Auxiliary ang bangkay ng 14 anyos na lalaki — ang huling nawawala sa mga nadawit sa insidente.

Nahanap ang bangkay sa lalim na 4 talampakan at natabunan umano ng debris ng bumagsak na tulay.

Noong Miyerkoles, narekober ang bangkay ng 7 pang kabataan.

Bumagsak noong gabi ng Martes ang tulay habang tinatambayan ng 13 kabataan na may edad 13 hanggang 17. Agad na-rescue at naitakbo sa ospital ang lima sa kanila.

May taas na 40 feet ang tulay, na 77 taon na. Hindi na ito ginagamit magmula 2014 dahil hindi umano ligtas.

Iginiit ng lokal na pamahalaan ng Dasmariñas na may babala sa tulay na bawal itong gamitin pero marami ang hindi sumusunod.

Ayon kay Mayor Jenny Barzaga, sasagutin ng lokal na pamahalaan ang gastusin sa burol at libing ng mga nasawi.

 RELATED VIDEO

Watch more News on iWantTFC
Bisitahin ang Patrol.PH para sa iba pang mga balita.