PatrolPH

5 miyembro ng Kadamay inaresto sa gitna ng protesta sa Bulacan

ABS-CBN News

Posted at Jul 28 2020 02:54 PM

Limang babaeng miyembro ng urban poor group na Kadamay ang inaresto ng pulisya sa Pandi, Bulacan habang nagdaraos ng protesta noong hapon ng Lunes.

Sa mga retratong ibinigay sa ABS-CBN News, makikita ang mga babaeng may hawak na placard na may nakasulat na "Aktibista, hindi terorista" at mga panawagan para sa social amelioration program.

Nangyari umano ang protesta sa harap ng bahay ng mga demonstrador bandang alas-3 ng hapon, isang oras bago ang State of the Nation Address ni Pangulong Rodrigo Duterte.

Makikita rin sa mga retrato na nakasuot ng face mask ang mga babae at sumusunod sa physical distancing.

Ayon kay Kadamay Spokesperson Mimi Doringo, sa gitna ng protesta ay dumating ang mga pulis at hinuli ang 5 sa 7 babaeng lumalahok dito.

Kinondena ng Kadamay ang anila'y lumalalang pananakot ng gobyerno.

Tumanggi ang Pandi police sa request ng ABS-CBN News na makausap ang miyembro ng Kadamay. 

Kailangan muna raw ng clearance mula kay Pandi police officer-in-charge Jun Alejandrino bago makapanayam ang mga naaresto.

Noong Linggo, kinumpiska rin ng Pandi police ang mga kopya ng dyaryong Pinoy Weekly sa opisina ng Kadamay.

-- Ulat ni Jervis Manahan, ABS-CBN News

Bisitahin ang Patrol.PH para sa iba pang mga balita.