Activist priest kinondena ang patuloy na patayan sa gitna ng pandemya

MAYNILA - Kinondena ng activist priest na si Robert Reyes ang umano ay patuloy na patayan sa gitna ng panahon ng pandemya kasunod ng pamamaril sa isang balut vendor sa Quezon City.

Ayon kay Reyes, doble na ang takot ng mga tao dahil bukod sa dami ng nagkakasakit at namatay sa pandemya, dumadagdag pa ang mga pinapatay sa mga kalsada.

Kinundena ni Father Robert Reyes ang pagpatay sa lalaki.

"Nagto-tokhang pa rin kayo ngayong panahon ng COVID? Talagang hindi lang halang ang inyong mga kaluluwa, galing na po kayo sa impyerno. Magtulungan tayong mabuhay. Huwag tayong nagpapatayan." | via @JervisManahan pic.twitter.com/SS3CFVYOot

— ABS-CBN News (@ABSCBNNews) July 20, 2020

"Nagto-Tokhang pa rin kayo ngayong panahon ng COVID? Talagang hindi lang halang ang inyong mga kaluluwa, galing na po kayo sa impiyerno. Magtulungan tayong mabuhay. Huwag tayong nagpapatayan," ani Reyes.

Binitwan ni Reyes ang pahayag kasunod ng pagpatay kay Gilbert Paala sa Barangay Pinyahan, Quezon City.

Pinagbabaril ng 3 lalaking nakasakay ng magkakahiwalay na motorsiklo si Paala pasado alas-6 ng gabi.

Patay ang isang lalaking nagtitinda ng balot matapos pagbabarilin ng riding in tandem sa Barangay Pinyahan, Quezon City.

Ayon sa isang witness, kalalabas lang ng kulungan ng biktima at nagbabagong buhay na. | via @JervisManahan

— ABS-CBN News (@ABSCBNNews) July 20, 2020

Kalalaya lang ni Paala matapos makulong sa mga kasong may kinalaman sa droga.

Noong isang linggo lang ay isang babae din ang pinatay sa parehong barangay. Hindi rin kilala ang mga salarin.

Patuloy naman ang imbestigasyon sa pagpatay kay Paala, ayon kay Lt. Col. Noli Abalos, commander ng Quezon City Police District Station 10.