PatrolPH

COVID-19 vaccination sa Maynila nagkatensiyon dahil sa limitadong doses

ABS-CBN News

Posted at Jul 20 2021 03:52 PM | Updated as of Jul 20 2021 07:56 PM

COVID-19 vaccination sa Maynila nagkatensiyon dahil sa limitadong doses 1
Uminit ang ulo ng marami sa anunsiyong hindi kayang turukan ang lahat ng pumila. George Calvelo, ABS-CBN News


MAYNILA — Nagkatensiyon sa bakunahan kontra COVID-19 Martes ng umaga sa San Andres Sports Complex sa Maynila matapos uminit ang ulo ng marami sa anunsiyong hindi kayang turukan ang lahat ng pumila. 

Si Tess Cariño, alas-4 ng madaling araw pa raw pumila pero hindi rin pinalad. 

"Nag-inform sa amin na hanggang 1,500 lang tapos namigay na pala sila ng number doon sa pinakadulo, wala kaming alam. Mga 9:30 a.m. kami na-inform na wala na, cutoff na," hinaing niya. 

Ang mga nakapasok sa 1,500 na quota, alas-3 ng madaling araw pa sa pila habang ang ilan ay doon na nagpalipas ng magdamag.

"Pumila kami mga 3 a.m. mahaba na po 'yung pila pero mas smooth siya kesa sa mga na-late po. Mga 8 hours po kaming naghintay pero worth it naman po kasi nakapagpa-vaccine kami," ani Claryl Orencia, nagpabakuna.

Pakiusap naman ng barangay, kaunting tiyaga pa sa mga gustong magpabakuna dahil hindi kaya i-accommodate ang libo-libo ng isang araw. 

Watch more on iWantTFC

"Ang tao kasi gustong mauna lagi. Pare-parehas nating gustong magpabakuna. Kaya lang hindi naman kakayanin ng gobyerno natin na sabay-sabay kayo lahat," ani Bernajun dela Cruz, kagawad ng Bgy. 705 ng Maynila. 

Dahil sobra-sobra ang dumating kaysa sa inisyal na alokasyon na 1,500 doses, nagpadala pa ng karagdagang 200 doses si Mayor Isko Moreno. 

—Ulat ni Jerome Lantin, ABS-CBN News

 KAUGNAY NA VIDEO: 

Watch more on iWantTFC
Bisitahin ang Patrol.PH para sa iba pang mga balita.