PatrolPH

Alert level system 'di muna aalisin habang walang bagong classification

ABS-CBN News

Posted at Jul 19 2022 12:38 PM | Updated as of Jul 19 2022 08:23 PM

Watch more News on iWantTFC

MAYNILA — Mananatili pa rin sa Alert Level 1 ang Metro Manila gayundin ang mga alert level na umiiral sa iba pang bahagi ng bansa.

Ito'y matapos magdesisyon si Pangulong Ferdinand Marcos Jr. na panatilihin ang alert level system hangga't wala pang nailalatag na bagong COVID-19 classification ang Department of Health at mga eksperto, sabi ngayong Martes ng Malacañang.

Ayon kay Department of Health (DOH) officer-in-charge Maria Rosario Vergeire, posibleng makapaglabas ang kagawaran ng bagong classification bago ang kalagitnaan ng Agosto.

Magugunitang ipinag-utos ni Marcos na i-reclassify ang COVID-19 restrictions para maging mas angkop sa kasalukuyang sitwasyon ng pandemya sa bansa.

"Kailangan ding pag-aralang maigi talaga itong alert level system natin, pag-aralan din kung ano 'yong pinaka-appropriate sa 'tin ngayon based on how we compare our situation from today, compared to maybe last year and compared to 2020," ani Vergeire sa panayam ng Teleradyo.

"Noong lumabas ang alert level system natin noong 2021, hindi pa ganoon kalawak ang pagbabakuna natin... wala pa tayong masyadong available na drugs for COVID-19," dagdag niya.

Bukas si Pangulong Marcos na luwagan ang ilang health restrictions kung dadami ang bilang ng mga Pilipino na nabakunahan ng booster shot laban sa COVID-19.

Watch more News on iWantTFC

Sa isang pulong sa Malacañang, sinabi ni Marcos sa DOH na dapat gawing mas accessible ang mga booster sa mga komunidad, lalo sa mga liblib na lugar.

"If and when we can improve on our booster coverage, we can be able to confidently say na ito puwede na nating luwagan, ayan puwede na nating tanggalin," ani Vergeire.

Ayon kay Vergeire, target ng DOH na mabakunahan ng booster ang hindi bababa sa 23 milyong Pilipino sa susunod na 80 araw para matiyak na tataas ang booster coverage sa unang 100 araw ni Marcos bilang pangulo.

Para magawa ito, kailangan ng pamahalaan na makapagbakuna ng hindi bababa sa 397,000 na tao kada araw.

Sa 55 milyong fully vaccinated na indibidwal sa bansa, nasa 15 milyon pa lang ang nakakakuha ng COVID-19 booster doses.

Kung mas marami ang mahihikayat na magpa-booster, mababawasan din ang bilang ng COVID-19 vaccines na malapit nang masayang dahil sa papalapit na expiration date.

Ayon kay Vergeire, nagbilin din si Marcos na gawan ng paraan na mai-donate sa mga nangangailangang bansa o maibalik sa COVAX Facility ang mga bakunang malapit nang mag-expire.

Pinag-aaralan din ngayon ng DOH ang mga insentibong maaaring ibigay para sa mga indibidwal at lokal na pamahalaan na lalahok sa pinaigting na kampanya para sa COVID-19 booster shots.

— May ulat ni Katrina Domingo, ABS-CBN News

Bisitahin ang Patrol.PH para sa iba pang mga balita.