Ikalawang batch ng mga labi ng mga OFW na namatay sa Saudi Arabia naiuwi na

MAYNILA — Dumating na sa bansa ngayong Linggo ang ikalawang batch ng mga labi ng mga overseas Filipino worker (OFW) na namatay sa Saudi Arabia.

Sa impormasyon mula sa Department of Labor and Employment, 88 labi ang sakay ng chartered flights na lumapag sa Ninoy Aquino International Airport Terminal 3 nitong umaga ng Linggo.

Second batch of OFW remains from Saudi Arabia has arrived in the Philippines. According to DOLE, there are 88 remains, including 45 #COVID19 cases, in today's arrival. (📷: @HansLeoCacdac) pic.twitter.com/FLBXptuHXR

— Michael Joe Delizo (@michael_delizo) July 19, 2020

Sa 88 bangkay, 45 ang namatay sa COVID-19, habang 43 sa ibang mga dahilan.

Galing ang 28 sa siyudad ng Al Khobar, 11 sa Jeddah, at 49 sa Riyadh.

Sinalubong ng mga opisyal ng DOLE at Overseas Workers Welfare Administration ang pagdating ng mga eroplano para bigyang pugay ang mga nasawing OFW sa maikling seremonya.

Makatatanggap ang pamilya ng mga namatay na OFW ng tulong, tulad ng cremation o burial services, bukod pa sa death, livelihood at scholarship benefits.

Ididiretso sa cremation ang mga namatay sa COVID-19, habang kailangan muna ng consent mula sa pamilya kung ipake-cremate din ang kaanak na namatay sa ibang dahilan.