TFC News

Radio program sa S. Korea ng TFC News correspondent, hall of famer sa media award

ABS-CBN News

Posted at Jul 18 2021 04:09 PM | Updated as of Jul 19 2021 06:15 PM

Watch more on iWantTFC

(2nd UPDATE) Kauna-unahang hall of famer sa Migration Advocacy and Media Awards ang radio program na kinabibilangan ni TFC News South Korea correspondent Gennie Kim.

Hindi madali ang mga pinagdaanan ni Gennie bilang migrant worker pero pursigido siyang maglingkod sa kaniyang kapwa Pilipino sa South Korea gamit ang media.

Mula sa pagiging factory worker sa South Korea, ngayon isa siya sa dalawang official correspondents ng TFC News.

"I’m a fulltime marriage counselor, translator... Dito po sa radio, freelancer po ako. And then freelancer din po ako, marketing consultant in private companies. Sa government agencies din po na may mga translation, by schedule," aniya.

"Lagi akong pumupunta 'pag kailangan nila like court, police and other company visitations po."

Nasa 19 na taon nang overseas Filipino worker sa South Korea si Gennie.

Inaral niya ang Korean language at sinuwerteng maging radio program host noong 2013 sa Multicultural Family Music Broadcasting kahit aniya, wala siyang background sa broadcasting o journalism. 

"Sa simula, 3 weeks na po, nakaramdam din ako ng discrimination. Kasi maraming nagpo-post na 'Ano ba yan, yung bagong DJ, bisaya.' Hindi po ako nagworry doon," aniya.

"Natatakot ako sa pronunciation ko, sa accent. Pero na-realize ko, na na-appreciate ako ng mga Koreans. Walong countries po kami dito, 8 different radio DJs. Ang purpose ng programang ito ay to make the foreigners feel at home. Ang programa ko po ay purely OPM (original Pinoy music)."

Nagbunga rin ang pagsisikap nina Gennie sa kanilang radio program dahil nakatanggap ang kanilang programa ng 3 parangal at naging kauna-unahang hall of famer ng Commission on Filipinos Overseas Migration Advocacy and Media Awards (CFO-MAM).

"Itong multicultural radio program na ito ay tumutulong sa mga migrant workers, lalo na yung mga Filipina na nakapangasawa ng Koreano. At napakarami po ng kanilang natulungan. At dahil dito, yung programa nila, isa sa mga na-awardan ng MAM awards, best radio journalism award in 2011. At ito’y naulit noong 2015, at noong 2017," ani Secretary Francisco Acosta ng commission.

"And because na-award sila ng tatlong beses, they are the first awardee ng hall of famer, MAM hall of famer. Yan po ang highest award na maibigay ng CFO sa isang outfit at isang personality."

Para kay Gennie, mahalaga ang kanyang role bilang miyembro ng media lalo na ngayong pandemic, bagay na pagbubutihan niya pa.

-- Ulat ni Apol Mabini, TFC News